काठमाडौं- नेपाली कांग्रेसका प्रमुख सचेतक एवं संघीय सांसद रमेश लेखकले रोजगारीको विकल्प वैदेशिक रोजगारी भएको बताएका छन् । नेपाल वैदेशिक रोजगार संघको यही माघ ६ गते हुने निर्वाचनमा नेपाल लोकतान्त्रिक वैदेशिक रोजगार व्यवसायी एसोसिएसनका उम्मेदवारहरुको आधिकारिक टिम घोषणा कार्यक्रममा लेखकले उक्त कुरा बताएका हुन् ।
मुलुक लामो समयदेखि वैदेशिक रोजगारीमा निर्भर रहँदै आएको भन्दै लेखकले वैदेशिक रोजगारी अनिवार्य विकल्प भएको बताए । उनले विदेश जानबाट युवाहरुलाई रोक्ने, मुलुकमै रोजगारी सिर्जना गर्ने चिल्ला कुरा मात्रै भएको र यसप्रति कसैले ध्यान नदिएको बताए ।
‘रोजगारी सिर्जनका लागि आवश्यक भौतिक पूर्वाधार, उद्योग कलकारखाना, कृषि तथा व्यवसायिक उत्पादनमा सुधार नगरी स्वदेशमा नै रोजगारीको कुरा गरिरहनुको कुनै अर्थ छैन,’ लेखकले भने, ‘वैदेशिक रोजगारी विश्वव्यापी टेण्डेन्सी हो, नेपालीहरु मलेसिया, खाडी कोरिया जान्छन् त्यहाँका मान्छे विकसित मुलुकमा गइरहेका छन्, यसलाई रोक्न सकिन्न ।’ उनले माओवादी जनयुद्धको समयमासमेत वैदेशिक रोजगारीले मुलुकको अर्थतन्त्र थामेको स्मरण गर्दै अहिले पनि रेमिट्यान्सकै भरमा मुलुक चलिरहेको बताए ।
सांसद लेखकले वैदेशिक रोजगारीको क्षेत्रमा उल्लेख्य भूमिका खेलेको भन्दै म्यानपावर व्यवसायीहरुको प्रशंसा गरे । संघको निर्वाचनमा कुमुद खनाल नेतृत्वको लोकतान्त्रिक प्यानललाई विजयी गराउन पनि उनले आग्रह गरे । उनले संघको निर्वाचनका सम्बन्धमा लोकतान्त्रिक एसोसिएसनभित्र देखिएको विवादलाई हल गरी एकतावद्ध भएर निर्वाचनमा जानुपर्ने बताए । यसका लागि एसोसिएसनमा विमति राखी व्यवसायीहरुले अध्यक्षलगायतका पदमा दिएको उम्मेदवारी स्थगन गरी सहमति र नीति, सिद्धान्तमा ध्यान दिन आग्रह गरे ।
नेपाली कांग्रेसको शुभेच्छुक संस्था लोकतान्त्रिक एसोसिएसनमा संघको निर्वाचनलाई लिएर उम्मेदवारी दिने आकांक्षीहरु धेरै भएपछि उत्पन्न भएको विवाद मिलाउने जिम्मा लेखकलाई दिइएको छ । यद्यपि, लेखकले विवाद समाधानका लागि गरेका प्रयास सफल नभएपछि एसोसिएसनका तर्फबाट भन्दै अध्यक्षमा भुवनसिं गुरुङले उम्मेदवारी दर्ता गराएका छन् भने उनले सिंगो प्यानल नै खडा गरेका छन् । तर, नेपाली कांग्रेसले खनाल समूहको प्यानललाई नै आधिकारिकता दिँदै आइतबार टिम घोषणा गरेको छ ।
लोकतान्त्रिक प्यानल घोषणा
वैदेशिक रोजगार व्यवसायी संघको यही माघ ६ गते हुने निर्वाचनका लागि नेपाल लोकतान्त्रिक वैदेशिक रोजगार व्यवसायी एसोसिएसनका उम्मेदवारहरुको आधिकारिक टिम घोषणा गरिएको छ । संघको नेतृत्वका लागि लामो समयदेखि उम्मेदवारीका विषयमा देखिएको विवादका बाबजुद पनि एसोसिएसनले आधिकारिक टिम घोषणा गरेको हो । नेपाली कांग्रेसले शुभेच्छुक संस्था लोकतान्त्रिक एसोसिएसनबाट कुमुद खनाललाई अध्यक्षमा अघि सारेको छ भने उनकै नेतृत्वको प्यानललाई आधिकारिकता दिएपछि आइतबार टिम घोषणा गरिएको हो ।
नेपाली कांग्रेसका प्रमुख सचेतक एवं सांसद लेखकको उपस्थितिमा घोषणा गरिएको टिमको अध्यक्षमा खनाल, प्रथम, द्वितीय र तृतीय उपाध्यक्षमा किशोरकुमार केसी, अख्तर हुसेन र सञ्जय पनेरु महासचिवमा मेघनाथ भुर्तेल, सचिवमा कर्णराज कटुवाल र कोषाध्यक्षमा हिमा गुरुङ उम्मेदवार रहेका छन् । त्यस्तै सदस्यहरुमा चन्द्र बहादुर लिम्बू, कैलाश पाठक, तोरणकुमार कार्की, नारायण भुसाल, राजकाजी भोलान, विक्रम श्रेष्ठ, मो. इजरायल, फिरोज खानलाई उम्मेदवारमा समेटिएको छ । १७ सदस्यीय कार्यसमितिका लागि दुई जनाको नाम अझै तय भइनसकेको एसोसिएसनले जनाएको छ ।
एसोसिएसनले तराई मधेस म्यानपावर व्यवसायी संघसँग पनि गठबन्धन गरेको छ । साथै, संघको तदर्थ समितिका संयोजक विमल ढकालले पनि एसोसिएसनलाई समर्थन गरेका छन् । उनले टिम घोषणा कार्यक्रमबाटै एसोसिएसनका उम्मेदवारलाई निर्वाचित गराउन सबै व्यवसायीलाई मतदान गर्न आग्रह गरे । त्यस्तै कार्यक्रमका प्रमुख अतिथिसमेत रहेका लेखकले उम्मेदवारहरुलाई कुनै निराश नभई निर्धक्कसँग चुनावमा भाग लिन र नतिजा आफ्नो पक्षमा पार्न निर्देशन नै गरे ।
टिम घोषणापछि अध्यक्षका उम्मेदवार खनालले वैदेशिक रोजगार व्यवसायलाई मर्यादित, व्यवस्थित, नियमित गर्ने तथा पेसागत हक हितको सुरक्षाका साथै कामदारका हकहित र सुरक्षामा ध्यान दिने मूल उद्देश्यका साथ आफूले उम्मेदवारी दिएको बताए । उनले वैदेशिक रोजगारको क्षेत्रमा भइरहेको चौतर्फी आक्रमणको अन्त्य गर्नका लागि व्यवसायिक एकतासहितको सक्षम र जुझारु नेतृत्व एवं समन्वयकारी भूमिका निर्वाह गर्न सक्ने संघको भूमिकालाई बढाउन लोकतान्त्रिक समूहलाई निर्वाचित गराउन आग्रह गरे ।
प्रकाशित मिति: सोमबार, माघ २, २०७९ १६:१२
-1752335779.jpg)
