काठमाडौं- वैदेशिक रोजगारीका लागि मलेसिया पुगेर अलपत्र परेका नेपाली श्रमिकहरु मंगलबार नेपाल फर्किंदै छन् । क्वालालम्पुरस्थित नेपाली दूतावासले उनीहरुलाई नेपाल फर्काउन लागेको जानकारी दिएको हो ।
नेपालबाट वैदेशिक रोजगारीमा पठाउने कम्पनी, रोजगारदाता र अलपत्र परेका नेपाली युवासँगको छलफल र समन्वयमा उनीहरुको उद्धार गरी नेपाल फर्काउन लागिएको दूतावासले जनाएको छ ।दूतावासले सोमबार एक सूचना जारी गर्दै मलेसियामा नेपाली नागरिकहरु अलपत्र परेको भन्ने विभिन्न सञ्चारमाध्यम तथा सामाजिक सञ्जालमा आएका समाचारहरुप्रति गम्भीर ध्यानाकर्षण भएको जनाएको छ । अलपत्र परेकाहरुको उद्धार तथा सहयोगका लागि काम भइरहेको दूतावासले उल्लेख गरेको छ ।
दूतावासले उल्लेख गरेअनुसार मलेसियाको प्लान्टेसन क्षेत्रमा काम गर्ने कम्पनी पिआरएस फरेस्ट म्यानेजमेन्ट एसडिएन बिएचडीमा काम गर्न गएका नेपालीले सम्झौताअनुसारको सेवा सुविधा र तलब नपाएको गुनासोसहित दूतावासमा गुनासो आएको जनाएको छ । गुनासो आउनासाथ गत डिसेम्बर २५ र २८ मा रोजगारदातालाई पत्राचार गर्दै जानकारी दिएको र ३० डिसेम्बरमा १३ जना नेपाली पठाउने त्रिवेणी ह्युमन रिसोर्स सोलुसन्सका प्रतिनिधिको रोहबरमा उनीहरूलाई नेपाल फर्काउने समझदारी भएको दूतावासले जनाएको छ ।
उक्त सहमतिका आधारमा १३ जनालाई नेपाल फर्कनका निम्ति आवश्यक पर्ने मलेसियाली अध्यागमन विभागको चेकआउट मेमो (एक्जिट पास) र हवाइ टिकटको व्यवस्था एवं नेपाल नफर्केसम्मका लागि खाने बस्ने व्यवस्था गरिएको दूतावासको भनाइ छ । उनीहरुमध्ये छ जना आज (१० जनवरी) र बाँकी सात जना १३ जनवरीमा नेपाल फर्कन लागेको दूतावासले जनाएको छ ।
यस्तै मलेसियाको कुखुरा आपूर्ति गर्ने कम्पनी होङ तेज इन्टरप्राइजेजमा काम गर्न पुगेका २८ जना नेपालीहरु अलपत्र परेको सम्बन्धमा मलेसियाली प्रहरीसमक्ष उजुरी गरिएको र यस विषयमा सम्बन्धित पीडकलाई पक्राउ गरेर प्रहरीले अनुसन्धान गरिरहेको दूतावासले उल्लेख गरेको छ । नेपालीहरुलाई काम गर्ने सिलिसिलामा कम्पनीका तर्फबाट भनाभन, कुटपिट भएको र तत्पश्चात् कम्पनीबाट निकालेर अन्यत्र राखेको भनी उजुरी परेको दूतावासले जनाएको छ ।
यस घटनामा ४ जनवरी २०२३ मा दूतावासका प्रतिनिधिले पीडित नेपाली नागरिकलाई भेटी समस्या समाधानको प्रयास भइरहेको जानकारी दिएको उल्लेख छ ।उक्त भेटपश्चात् ६ जनवरीमा नेपालीहरुलाई मलेसिया रोजगारीमा पठाउने खोजी रिक्र्युटमेन्टका प्रतिनिधि, रोजगारदातासमेतको सहभागितामा दूतावासमा भएको छलफलले नेपाल फर्कन चाहने नेपालीहरुलाई तुरुन्त घर फर्काउने र काममा फर्कन चाहनेलाई सुरक्षित कार्य वातावरणको प्रत्याभूति गराउने निर्णय भएको दूतावासले जनाएको छ ।
उक्त निर्णयका आधारमा नौ जना नेपाली नागरिक सोही काममा फर्किसकेको, सात जना ११ जनवरीको दिन नेपाल फर्कने व्यवस्था भएको र बाँकी १२ जनालाई नेपाल फर्कने वा रोजगारीमा फर्कने भन्नेबारे उनीहरुको छनोटअनुसारको व्यवस्था गरिने दूतावासले प्रस्ट पारेको छ ।यसै सन्दर्भमा विभिन्न माध्यमबाट मलेसिया गएका नेपालीहरु समस्यामा (बन्धक) भएको गुनासो तथा भिडियो सार्वजनिक भएपछि सोमबार बिहान प्रधानमन्त्री पुष्पकमल दाहालले उनीहरुको अवस्था बुझेर तत्काल रिहाइ तथा उद्धारको पहल गर्न मुख्यसचिव शंकरदास वैरागीलाई निर्देशन दिएका थिए । सोही आधारमा परराष्ट्र मन्त्रालयमार्फत मलेसियास्थित नेपाली दूतावासलाई आवश्यक उद्धार कार्य गर्न निर्देशन दिइएको थियो ।
