काठमाडौं – वैदेशिक रोजगारमा जाने कामदारले बिमाबापतको शुल्क अनलाइनबाट भुक्तानी गर्न सक्ने भएका छन् । शुक्रबार इसेवा, फोनपे र वैदेशिक रोजगार विभागले सम्झौता गर्दै कामदारले घरमै बसेर निःशुल्क बिमा गराउन सकिने गरी अनलाइन भुक्तानीको सुरुवात गरेको हो ।
विभागका महानिर्देशक डा.भीष्मकुमार भुषालका अनुसार इसेवाले बिमा शुल्कको रकम सम्बन्धित बिमा कम्पनीको बैंक खातामा जम्मा गरिदिनेछ । त्यस्तो रकम प्रत्येक दिन म्यादी बिमा जारी गर्ने कम्पनीले तोकेको बैंक खातामा जम्मा गर्ने व्यवस्था मिलाउने छ ।
त्यस्तै, इसेवाले श्रमिकको म्यादी बिमा भएको जानकारी वैदेशिक रोजगार सूचना व्यवस्थापन प्रणाली (फेम्स) मा अद्यावधिक गर्नुका साथै बिमांक रकम भुक्तानी भए÷ नभएको रूजु गर्न पोर्टलको व्यवस्था मिलाउने महानिर्देशक डा.भुषालले बताएका छन् । यदि प्राविधिक कारणले सेवा अवरूद्ध भएमा पनि सो समस्या तत्काल समाधान गर्न दुवै पक्षले पहल गर्ने उनले बताए ।
विभागले अनलाइन भुक्तानी प्रक्रियामा जानका लागि बिमा कम्पनीलाई सम्झौताका लागि पटक–पटक आह्वान गर्दै आए पनि आनाकानी गर्दै आएकाले बिमा कम्पनीहरूले विभागसँग सम्झौता गर्नेबित्तिकै बिमाबापतको रकम इसेवाबाट अनलाइन भुक्तानी गर्न सकिने महानिर्देशक डा.भुषालले बताए । त्यसका साथै वैदेशिक रोजगार बोर्डमा जाने कल्याणकारी कोषको रकम पनि इसेवाबाट भुक्तानी गर्न चाँडै सम्झौता हुने र अन्य अनलाइन भुक्तानी प्रदायक संस्थाहरूले पनि आइतबार विभागसँग सम्झौता गर्न लागेको उनले जानकारी दिएका छन् ।
हाल, वैदेशिक रोजगारीमा जाने कामदारको म्यादी बिमाका लागि १९ वटा बिमा कम्पनी भए तापनि पुल सिस्टम लागू गर्दै ४ वटाले मात्र काम गर्दै आएका छन् । जसमा सूर्य लाइफ इन्स्योरेन्स कम्पनी लिमिटेड, रिलायबल लाइफ इन्स्योरेन्स कम्पनी लिमिटेड, युनियन लाइफ इन्स्योरेन्स लिमिटेड र नेसनल लाइफ इन्स्योरेन्स लिमिटेड रहेका छन् । यीमध्ये पुस महिनामा सबैभन्दा बढी सूर्य लाइफ इन्स्योरेन्सले बिमा गरेको तथ्यांकले देखाएको छ । जसमा सूर्यले २२ हजार ८० वटा, रिलायवलले ११ हजार ६ सय १३ वटा, नेशनलले ९ हजार ७ सय १३ र युनियन लाइफ इन्स्योरेन्सले ७ हजार ८ सय ६१ वटा बिमा गरेको छ ।
प्रकाशित मिति: आइतबार, माघ १२, २०७६ ०५:२७
-1745656903.jpeg)