काठमाडौं- वैदेशिक रोजगारीका नाममा हुने ठगी घटना अनियन्त्रित बनेको छ । पछिल्लो एक सातामै यस्ता ठगीमा संलग्न तीन जना पक्राउ परेका छन् । नेपाल प्रहरीको काठमाडौं उपत्यका अपराध अनुसन्धान कार्यालयले विभिन्न स्थानबाट उनीहरुलाई पक्राउ गरेको हो ।
ठगीमा संलग्नहरुले कतार, साइप्रस र अमेरिकालगायतका देशमा पठाइदिने भन्दै अकर्षक आम्दानीको प्रलोभनमा पारी रकम ठगी गरेको प्रहरीले जनाएको छ । कीर्तिपुर बस्दै आएका झापा, धुलाबारी १० स्थायी घर भएका ३२ वर्षीय हेमसागर भण्डारीले वैदेशिक रोजगारीका लागि कतार पठाइदिने भन्दै समिर तामाङसँग पटक–पटक गरी एक लाख ७२ हजार रुपैयाँ लिएर फरार भएको आरोपमा प्रहरीले काठमाडौंको बानेश्वरबाट यही पुस १७ गते पक्राउ गरेको जनाएको छ ।
भण्डारीले कतारको एक प्रतिष्ठित कम्पनीमा मासिक एक लाखसम्म कमाइ हुने प्रलोभन देखाई पीडितसँग पैसा लिएर सम्पर्कमा नबसी फरार भएको अवस्थामा पक्राउ परेको प्रहरीले उल्लेख गरेको छ ।ठगी गरेको आरोपमा पक्राउ परेका अर्का व्यक्ति हुन् राजेश थापा । ललितपुर महानगरपालिका कुपण्डोल स्थायी घर भएका ४४ वर्षीय थापाले वैदेशिक रोजगारीमा अमेरिका, क्यानडा, अस्ट्रेलिया र हङकङ पठाइदिने भन्दै विभिन्न व्यक्तिहरुबाट एक करोड ६२ लाख छ हजार रुपैयाँ संकलन गरी फरार रहेको अवस्थामा प्रहरीले पक्राउ गरेको जनाएको छ ।
उल्लेखित देशमा मासिक तीन लाख रुपैयाँ बढी तलब हुने प्रलोभन देखाई प्रतिव्यक्ति २५ लाख रुपैयाँ लाग्ने भन्दै पीडितहरुसँग रकम संकलन गरी सम्पर्कविहीन भएको भनी परेको उजुरीका आधारमा थापालाई लैनचौरबाट पक्राउ गरिएको प्रहरीले जानकारी दिएको छ । थापाले ती देशमा पठाइदिने मात्र नभई ग्रिन कार्ड, पिआर र हङकङ आइडीसमेत बनाइदिने आश्वासन दिएको पीडितहरुको भनाइ छ ।
यसैगरी ठगी आरोपमा पक्राउ परेका तेस्रो व्यक्ति हुन् विनोद लुहार । पुरानो बानेश्वर बस्दै आएका कञ्चनपुर भीमदत्त नगरपालिका स्थायी घर भएका ३० वर्षीय लुहारले वर्किङ भिसामा साइप्रस पठाइदिने भन्दै सौरभ नेपालसँग छ लाख रुपैयाँ लिएर सम्पर्कमा नबसी फरार रहेको अवस्थामा प्रहरीले पक्राउ गरेको जनाएको छ । लुहारले साइप्रसको एक प्रतिष्ठित होटलमा काम लगाइदिने भन्दै १५ लाख रुपैयाँ लाग्ने बताएर पटक–पटक गरी नेपालसँग छ लाख रुपैयाँ लिएको उजुरीका आधारमा नयाँ बानेश्वरबाट पक्राउ गरिएको प्रहरीले जानकारी दिएको छ ।
आकर्षक आम्दानीको लोभ देखाई विदेश पठाइदिने नाममा ठगी गरेको पाइएकाले उनीहरुलाई अनुसन्धानका लागि पक्राउ गरी सरोकारवाला निकायमा बुझाइएको अपराध अनुसन्धान कार्यालयका प्रहरी उपरीक्षक कृष्णप्रसाद कोइरालाले जानकारी दिए । भण्डारी र लुहारलाई वैदेशिक रोजगार विभागले पक्राउ गरी उपस्थित गराइदिन आग्रह गर्दै पत्राचार गरेपछि प्रहरीले पक्राउ गरेको हो ।
पक्राउ परेका उनीहरुलाई थप अनुसन्धानका लागि विभागमा बुझाइएको कोइरालाले बताए । थापालाई भने मुलुकी अपराध संहिताबमोजिम अनुसन्धान तथा कारबाहीका लागि जिल्ला प्रहरी कार्यालय टेकुमा पठाइएको प्रहरीले जनाएको छ ।
विदेशमा आकर्षक तलब प्राप्त हुने लोभमा फस्दा नेपालीहरु दैनिकजसो ठगिँदै आएको विभागका निर्देशक एवं सूचना अधिकारी कृष्ण प्रसाद भुसालले बताए । पछिल्लो समय ठगीको घटना बढ्दै गएको उनले बताए । भुसालले विभागमा थुप्रै उजुरी पर्ने गरेको र नेपाल प्रहरीको समन्वयमा ठगीमा संलग्नहरुलाई पक्राउ गरिरहेको बताए ।
यद्यपि विभागले पक्राउ परेकाहरुबाट पीडितहरुलाई क्षतिपूर्तिसमेत दिलाउँदै आएको जनाएको छ । विभागले चालु आर्थिक बर्षको पाँच महिनाको अवधिमा एक हजार १९० वटा ठगीका उजुरी परेको उल्लेख गरेको छ । उजुरी परेकामध्ये १७० वटा मुद्दालाई मिलापत्र गराई आठ करोड ५१ लाख ५३ हजार रुपैयाँ क्षतिपूर्ति दिलाएको विभागले जनाएको छ ।
