काठमाडौं– कामदार भिसामा जापान जानै मुश्किल भएको छ । जापानले १४ क्षेत्रमा नेपाली कामदार लैजाने भनेर ११ चैत ०७५ मा समझादरी गरेको भए पनि अहिलेसम्म एक जना पनि कामदार जापान जान नसकेपछि नेपाली कामदारलाई जापान छिर्न मुश्किल भएको हो ।
सन् २०१९ का लागि जापानले विभिन्न उद्योग, कलकारखाना, कृषि, नर्सिङ केयरजस्ता १४ क्षेत्रमा नेपाली कामदार लैजाने समझदारी गरेको थियो । जसमध्ये नर्सिङ केयरका लागि आउट सोर्सिङ कम्पनी जापान फाउन्डेसनले भाषा परीक्षा तथा सीप परीक्षणसमेत गरिसकेको छ । जापान फाउन्डेसनको वेबसाइट अनुसार पहिलो चरणको भाषा परीक्षा १२ जना सहभागी भएकामा १ जना मात्र उत्तीर्ण भएको र सीप परीक्षाको सहभागी सबै अनुत्तीर्ण भएको उल्लेख गरेको छ ।
त्यस्तै दोस्रो चरणमा भएको परीक्षामा ५६ जना उत्तीर्ण भएको सार्वजनिक भएको छ । तर जापानमा कामदारमा भिसामा लैजान उत्तीर्ण भएको विद्यार्थीहरूको आधिकारिक नतिजा आइनसकेको श्रम, रोजगार तथा सामाजिक सुरक्षा मन्त्रालयले जनाएको छ ।
तर, जापानले सन् २०१९ को कामदार लैजाने नसकिरहेको अवस्थामा २०२० मा पनि नर्सिङ केयरमा कामदार लैजानका लागि भाषा तथा सीप परीक्षाको मिति तय गरेर सार्वजनिक गरिसकेको छ । सार्वजनिक गरिएको सूचनाअनुसार जापानले जनवरी र मार्चमा परीक्षा मिति तय गर्दै २ हजार ३ सय नेपाली कामदार लैजाने घोषणा गरेको छ ।
वैदेशिक रोजगार विभागले उक्त सूचना सार्वजनिक गरेसँगै अहिले हरेक इन्स्टिच्युटमा जापानिज भाषा पढ्ने युवाहरूको भिड लाग्न थालेको छ । काठमाडौंको चाबहिलमा रहेको न्युटन इन्स्टिच्युटकका म्यानेजर राजेन्द्र श्रेष्ठले भने, ‘पहिला विद्यार्थी भिसामा अध्ययन गर्ने विद्यार्थीको तुलनामा यो सूचना सार्वजनिक भएसँगै विद्यार्थीहको संख्या बढेको छ ।’
त्यस्तै, भ्याली कन्सल्टेन्सीमा पनि पहिलेको तुलनामा जापानले कामदार भिसामा लैजाने भनेपछि विद्यार्थीहरूको चाप बढेको छ । यसबारे काठमाडौंकै केही कन्सल्टेन्सीमा पुगेर सोधबुझ गर्दा विभिन्न प्रलोभन देखाएर हरेकले मनलाग्दो रकम लिँदै भाषा पढाएको पाइएको छ ।
