काठमाडाैं - पाँच महिना २८ दिन श्रम मन्त्रालयको जिम्मेवारी सम्हालेर श्रम, रोजगार तथा सामाजिक सुरक्षा मन्त्री शेरबहादुर कुँवर बिदा भएका छन् ।
सोमबार श्रम मन्त्रालयमा एक औपचारिक कार्यक्रमको आयोजनासहित मन्त्री कुँवरको बिदाइ गरिएको छ । कार्यक्रममा मन्त्री कुँवरले आफूले यो अवधिमा गरेको महत्त्वपूर्ण कामहरू पनि सार्वजनिक गरेका छन् ।
२०७९ साल असार १३ गते मन्त्रालयको जिम्मेवारी सम्हालेका मन्त्री कुँवरले योबीचमा केही महत्त्वपूर्ण कामहरू गरेका छन् ।
वैदेशिक रोजगारीमा गएका श्रमिक, स्वरोजगार र अनौपचारिक क्षेत्रका श्रमिकलाई समेत सामाजिक सुरक्षा कोषको दायरामा समेट्ने काम मन्त्री कुँवरकै नेतृत्वमा भएकाे छ ।
यस्तै वैदेशिक रोजगारीबाट फर्किएकाको पुनः एकीकरण कार्यक्रमका साथै आन्तरिक रोजगारी सिर्जना, श्रमिकका गुनासा सिधै आफैँ सुन्नका लागि श्रम मन्त्रीसँग श्रमिक कार्यक्रम सञ्चालनदेखि श्रम स्वीकृतिको सम्पूर्ण काम अनलाइन प्रणालीमार्फत प्रदान गर्ने, केन्द्र केन्द्रित श्रम स्वीकृतिको कामलाई प्रदेश स्तरसम्म पुर्याउनुका साथै निःशुल्क भिसा र टिकटमा श्रमिकलाई विदेश पठाउने सम्मको काम आफ्नो कार्यकालमा फलदायी भएको मन्त्री कुँवरले दाबी गरेका छन् ।
