काठमाडौं– वैदेशिक रोजगारीका लागि साउदी अरेबिया पुगेर विभिन्न समस्यामा परी कठिनाइ झेलिरहेका थप ६९ जना नेपालीले ‘एक्जिट भिसा’ (बहिर्गमन भिसा) पाएका छन् । साउदीको अध्यागमन कार्यालयले लागू गरेको नयाँ नियमानुसार हुरुब (कम्पनी छोडेर भागेका) लागेका र इकामा (बस्ने अनुमति) नपाएका ६९ जना नेपालीले उक्त भिसा पाएका हुन् ।
साउदी अध्यागमनले लागू गरेको नियमानुसार एक्जिट भिसा प्राप्त गरेका व्यक्तिहरुले बढीमा एक हप्ताभित्र साउदी छोडिसक्नुपर्ने रियादस्थित नेपाली दूतावासले जनाएको छ । हुरुब लागेर विभिन्न समयमा रियादबाट प्रोसेसिङ गरेका २७ जना र इकामा नभएका ३७ र श्रम अवधिमा सकिएका पाँच जना गरी ६९ जनाले एक्जिट भिसा प्राप्त भएको दूतावासले उल्लेख गरेको छ ।
हुरुब लागेका नेपालीहरुलाई एक साताभित्र साउदी छोड्न जानकारी दिंदै समयमै एक्जिट भिसाको म्याद हेर्न पनि दूतावासले अनुरोध गरेको छ । एक हप्ता अगाडि नै एक्जिट भिसा आएको भन्दै दूतावासले आफ्नो मोबाइलमा सन्देश प्राप्त नभए दूतावास आएर एक्जिट भिसाको पेपर लैजान सकिने जनाएको छ ।
आफूले एक्जिट भिसा पाए÷नपाएको जानकारी दूतावासको आधिकारिक फेसबुक पेज वा वेवसाइटमा हेर्न सकिने बताइएको छ । एक्जिट भिसा प्रोसेसिङ निःशुल्क हुने र यसबापत एक हलाला पनि कहीँ कतै बुझाउनु नपर्ने दूतावासले उल्लेख गरेको छ । तर, एक्जिट भिसा आइसकेपछि नेपाल फर्किने हवाई टिकट व्यक्ति स्वयंले व्यवस्था गर्नुपर्ने उल्लेख गरिएको छ ।
इकामा (बस्ने अनुमति)को म्याद सकिएको तीन महिनाभन्दा बढी भइसकेका वा साउदी आएको तीन महिनाभन्दा बढी समयसम्म पनि इकामा प्राप्त नगरेका वा हुरूब लागेका व्यक्तिको मात्र एक्जिट भिसा प्रोसेसिङ दूतावासले गरिदिने जनाइएको छ । त्यसैगरी, कुनै केस वा जरिवाना छ भने त्यसको छिनोफानो नभएसम्म एक्जिट भिसा नलाग्ने र भिसा दिने सम्पूर्ण अधिकार साउदीको अध्यागमन कार्यालसँग मात्रै हुने दूतावासले जानकारी दिएको छ ।
यसअघि ५४ जनाको एक्जिट भिसा लागेको दूतावासले जानकारी दिएको थियो । पछिल्लो छ महिनाको अवधिमा पटक–पटक गरी झण्डै एक हजार ४०० को हाराहारीमा नेपालीहरुले एक्जिट भिसा पाइसकेको दूतावासको तथ्यांक छ ।
दिए ।
प्रकाशित मिति: सोमबार, पुस ११, २०७९ ०७:४७
-1745656903.jpeg)