काठमाडौं - श्रम, रोजगार तथा सामाजिक सुरक्षामन्त्री शेरबहादुर कुँवरले भर्खरै नियुक्त भएका काउन्सिलर (श्रम) र श्रम सहचारीलाई श्रमिक र देशको हितमा काम गर्न निर्देशन दिएका छन् ।
रोजगारीका लागि विभिन्न मुलुकमा रहेका नेपालीहरूको समस्या समधानको पहल गर्न र रोजगारीका अवसरहरूलाई समन्वय गर्नुपर्ने जिम्मेवारीसहित पदस्थापन भएका उनीहरूलाई मन्त्री कुँवरले उक्त निर्देशन दिएका हुन् ।
विभिन्न मुलुकमा पदस्थापन भई जाने काउन्सिलर र श्रम सहचारीका लागि सञ्चालन गरिएको तीन दिने अभिमुखीकरण तालिम समापनका अवसरमा मन्त्री कुँवरले विदेशमा रहेका श्रमिकहरूको समस्या सम्बोधन नभएको धेरै गुनासा आउने गरेको बताउँदै
उनीहरूको समस्या समाधानका लागि प्रभावकारी भूमिका खेल्नुपर्ने बताए ।
उनले श्रमिकको हक अधिकारको संरक्षण, समस्या परेको अवस्थामा उद्धार तथा रोजगारदाता र कामदारबीच भएको विवाद समाधानमा काउन्सिलर र श्रम सहचारीहरूले समन्वयात्मक भूमिका निर्वाह गर्नुपर्नेमा जोड दिए ।
मन्त्री कुँवरले उनीहरूलाई सम्बन्धित गन्तव्य मुलुकमा काम गर्दा त्यहाँको ऐन, कानुनको अध्ययन गरेर मात्रै आवश्यक कदम चाल्न र उचित व्यवहार गर्न आग्रह गरे ।
मन्त्रालयका सचिव एकनारायण अर्यालले काउन्सिलर र श्रम सहचारीलाई आफ्नो जिम्मेवारी र उत्तरदायित्वको बोध गराउँदै काम गर्न निर्देशन दिए । उनले परिस्थितिअनुसार समन्वय र सञ्चार, श्रमिकको अवस्था, डिमाण्ड दिने कम्पनीको विस्तृत जानकारी राखेर मात्रै श्रमसम्बन्धी प्रक्रिया बढाउनुपर्ने बताए ।
उनले सम्बन्धित देशको ऐन कानुन प्रस्ट बुझेर मात्रै काम गर्न सुझाए । काउन्सिलर र श्रम सहचारीलाई अभिमुखीकरण अवधिभर वैदेशिक रोजगार व्यवस्थापन प्रणाली, श्रम आप्रवासन, द्विपक्षीय श्रम सम्झौता, श्रम कूटनीति, वैदेशिक रोजगारसम्बन्धी कानुनलगायतका विषयमा विज्ञहरूले प्रशिक्षण दिएका थिए ।
मन्त्रालयले विदेशमा नेपाली श्रमिकहरूको सहयोगका लागि काउन्सिलर तथा श्रम सहचारी राख्न सकिने कानुनी व्यवस्थाका आधारमा उनीहरूलाई विभिन्न मुलुकमा पदस्थापन गरेको हो । जसअन्तर्गत काउन्सिलर पदमा मलेसियाका लागि भोलानाथ
गुरागाईं, दक्षिण कोरियाका लागि चन्द्रकला चौलागाईं ओली र कतारका लागि टीकामणि न्यौपानेलाई नियुक्त गरेको छ ।
त्यसैगरी श्रम सहचारीमा साउदी अरेबियामा ताम्रराज काफ्ले, मलेसियामा दीलिप खड्का, ओमानमा गोविन्दप्रसाद आचार्य र युुएईमा आविद अन्सारीलाई खटाइएको छ ।
