काठमाडौं– विभिन्न मुलुकहरूमा अध्ययन भिसामा जानेको संख्या बढेसँगै दक्षिण कोरियामा पनि अध्ययन भिसामा जानेको संख्या बढ्दै गएको छ । पछिल्लो समय कोरिया सरकारले अध्ययन गर्न जाने विदेशी विद्यार्थीहरूलाई उच्च शिक्षासँगै रोजगारीको पनि अवसर दिएपछि कोरियामा अध्ययन भिसामा जानेको संख्या बढेको हो ।
कोरियाले रोजगारी अनुमति प्रणाली (इपिएस) अन्तर्गत सन् २००८ देखि नेपाली युवाहरूलाई आफ्नो देशमा रोजगारीका लागि अवसर दिँदै आएको छ । त्यसका लागि एचआरडीले तोकेबमोजिम भाषा र सीप परीक्षा उत्तीर्ण हुनुपर्छ । तर, कोरियाले इपिएसमा पास गरे पनि नलैजाने र भाषा परीक्षा मात्र होइन, सीप परीक्षा पनि दिनुपर्नेजस्ता व्यवस्थाहरू आएकाले विद्यार्थीहरूमा हुने प्रतिस्पर्धाले परीक्षामा असफल भएका विद्यार्थीले विकल्पका रूपमा कोरियामा अध्ययन भिसामा जानका लागि आकर्षण बढेको लामो समयदेखि विदेशमा अध्ययन भिसामा शैक्षिक परामर्श दिँदै आएका इन्स्टिच्युटहरूले जनाएका छन् ।
काठमाडौंको चाबहिलमा लामो समयदेखि विदेशमा अध्ययन भिसामा पठाउँदै आएको भ्याली इन्स्टिच्युटका अनुसार कोरियामा उच्च शिक्षासँगै छोटो समयमा आकर्षक कमाइ पनि हुने भएकाले सुरक्षित गन्तव्यका रूपमा लिइएको हो । त्यसैले कोरियामा विद्यार्थी भिसामा अधिकांश भाषा परीक्षा अनुत्तीर्ण भएकाले दरखास्त दिएको इन्स्टिच्युटले जनाएको छ । त्यत्ति मात्र होइन, कोरियन भाषा पढ्दै गरेका विद्यार्थीहरूले पनि इपिएसमा असफल भएमा विकल्पको रूपमा अध्ययन भिसामा जाने सोच बनाएको बताउँदै आएका छन् ।
खोटाङ घर भई हाल कपनमा बसेर कोरियन भाषा पढिरहेका नरेन्द्र राईले भने, ‘यदि यो वर्ष कोरियन भाषाको परीक्षामा असफल भएमा अध्ययन भिसामा पैसा खर्च गरेर पनि जाने सोच बनाएको छु ।’ त्यस्तै सोलुखुम्बुका भास्कर राईले पनि नरेन्द्रले जस्तै सोच बनाएको बताए । यता यो वर्ष लिइएको सीप परीक्षामा अनुत्तीर्ण भएका सुवास कार्कीले पनि अध्ययन भिसाका लागि पढ्न सुरु गरेको बताएका छन् । दक्षिण कोरियाका लागि अध्ययन भिसामा विद्यार्थीहरूलाई पठाउँदै आएको इन्स्टिच्युटका अनुसार पछिल्लो समय प्राविधिक अध्ययनतर्फ मेकानिकल, मेसिनरी, वेल्डिङ, आइटी, होटल म्यानेजमेन्ट, नर्सिङमा विद्यार्थीहरूको बढी आर्कषण रहेको छ ।
