दोहा– ओमानमा पनि नेपाल भ्रमण वर्षको सुरुआत गरिएको छ । ओमनस्थित नेपाली दूताबासले ओमानको इस्ति भिलेजमा एक कार्यक्रमको बीच नेपाल भ्रमण वर्षको उद्घाटन गरेको हो ।
नेपाल सरकारले सन् २०२० लाई भ्रमण वर्षको रूपमा मनाउने घोषणा गरेसँगै ओमानस्थिन नेपाली दूताबासले पनि विविध कार्यक्रम गरी यसलाई सफल बनाउने तयारीसहित उद्घाटन गरेको दूताबासले जनाएको छ ।
कार्यक्रम राजधानीभन्दा टाढा गरिएको थियो । ओमानी सभ्यताको पहिचान दिने यो प्राचीन बस्तीले कार्यक्रमका सहभागीहरूलाई ओमानको इतिहाससँग साक्षात्कार हुने मौका प्रदान गरेको दूताबासले जनाएको छ ।
करिब एक हजार जनाको बसोबास रहेको उक्त बस्तीमा कार्यक्रमले ओमानी जनतासँग नजिकको सम्बन्ध स्थापित गर्दै पर्यटन प्रबद्र्धनमा लक्षित समूहसँग नजिक हुने वातारणको सिर्जना गरेको ओमनस्थित नेपाली दूताबासले जनाएको छ ।
कार्यक्रममा राजदूत शर्मिला पराजुली ढकालले नेपाली पर्यटनका विविध आयामहरूबारे जानकारी दिँदै नेपाली कला, संस्कृति तथा प्राकृतिक सौन्दर्यको अलावा यसै वर्ष अथवा आगामी वर्षमा नेपाल किन घुम्ने भन्ने कुरामा विशेष जोड दिएकी थिइन् ।
कार्यक्रमका प्रमुख अतिथि शेख खलिफा अलि अल हार्थीले नेपाल आफूलाई धेरै मन पर्ने बताउँदै नेपाली दूताबासको निमन्त्रणा स्वीकार गरी नेपाल सरकारले सुरू गरेको कार्यलाई साथ दिन र ओमानी पर्यटकहरूलाई नेपाल भ्रमणमा जान प्रेरित गर्न सहभागी भएको बताएका थिए । सगरमाथाको सफल आरोहण गरेकी पहिलो ओमानी महिला नदिरा अल हार्थीले आफूले नेपाल भ्रमण तथा सगरमाथा आरोहण गर्दाको रोमाञ्चकारी अनुभव सुनाएकी थिइन् ।
कार्यक्रममा नेपाली गीत गाउने पहिलो अरबिक गायक हाइथम मोहम्मद रफिले नेपाली कला संस्कृतिबारे आफ्नो भनाइ राख्दै एक नेपाली तथा एक अरबिक गीत गाएर मनोरञ्जन प्रदान गरेका थिए ।
ओमानका लागि नेपाल भ्रमण वर्ष २०२० को सद्भावना दूतका रूपमा नियुक्त संगीत तथा संस्कृतितर्फ अरबिक गायक हाइतथम मोहम्मद रफि, साहसिक पर्यटनतर्फ नादिरा अल हार्थी र सामाजिक अगुवा तथा प्राज्ञिक व्यक्तित्व डा.चिथ्रा नारायणलाई राजदूत ढकालले नियुक्तिको प्रमाण पत्र हस्तान्तरण गरेको दूताबासले जनाएको छ ।
ओमानस्थित नेपाली समुदायको सक्रिय सहभागिता रहेको सो कार्यक्रममा विशिष्ट नेपाली खानाका परिकारहरू (सेलरोटी, मःमः, ढिक्री, भक्का, दालको फुरौला, गुन्द्रुकको अचार, चुकाउनीलगायत परिकारहरू) प्रत्यक्ष रूपमा कार्यक्रम स्थलमा नै तयार गरी अतिथिहरूलाई नौलो स्वादहहरू पस्किइएको दूताबासले जनाएको छ ।
