काठमाडौं– वैदेशिक रोजगारीका लागि अमेरिका र पोर्चुगल पठाइदिन्छु भन्दै विभिन्न व्यक्तिबाट रकम लिएर फरार रहेको आरोपमा प्रहरीले दुई जनालाई पक्राउ गरेको छ ।
अमेरिकाको एक प्रतिष्ठित कम्पनीमा आकर्षक रोजगारी दिलाइदिने भन्दै एक जनाले १४ लाख सात हजार रुपैयाँ र अर्कोले पोर्चुगलस्थित एक पाँच तारे होटलमा काम मिलाइदिने भन्दै २१ लाख रुपैयाँ ठगी गरेको आरोपमा प्रहरीले पक्राउ गरेको हो ।
उल्लिखित दुई घटनामा ३५ लाख सात हजार रुपैयाँ ठगी गरेको पाइएको प्रहरीले जनाएको छ । अमेरिका पठाइदिने र आकर्षक आम्दानी हुने लोभ देखाएर पीडितसँग १४ लाख सात हजार रुपैयाँ ठगी गरेको अभियोगमा ललितपुर महालक्ष्मी नगरपालिका–५ बस्ने रामेछाप नगरपालिका रामपुर घर भएका ३४ वर्षीय योगेशराज श्रेष्ठलाई गत सोमबार प्रहरीले पक्राउ गरेको हो ।
उनलाई उपत्यका अपराध अनुसन्धान कार्यालयबाट खटिएको प्रहरी टोलीले सातदोबाटोबाट पक्राउ गरेको जनाएको छ । श्रेष्ठले पीडितसँग पटक–पटक गरी अमेरिका जानका लागि प्रतिव्यक्ति २५ लाख रुपैयाँ लाग्ने भनिए पनि १४ लाख सात हजार रुपैयाँ मात्रै लिएको र त्यहाँको एक प्रतिष्ठित कम्पनीमा लाखौं रुपैयाँ तलब हुने भनी प्रलोभनमा पारेर रकम संकलन गरी फरार भएको बताइएको छ ।
पीडितबाट रकम संकलन गरी सम्पर्कसमेत नगरी फरार रहेको अवस्थामा उनलाई प्रहरीले पक्राउ गरेको हो ।त्यस्तै, गत सोमबार नै पोर्चुगल पठाइदिन्छु भन्दै ठगी गरेको अभियोगमा काठमाडौंको सुविधानगर बस्ने सर्लाही हरिपुर–१ स्थायी घर भएकी ३० वर्षीय धनकुमारी ओलीलाई पनि प्रहरीले पक्राउ गरेको छ ।
उनले पोर्चुगल पुगेपछि एक प्रतिष्ठित फाइभस्टार होटलमा काम लगाइदिने प्रलोभन देखाई प्रतिव्यक्ति १३ लाख रुपैयाँ लाग्ने भन्दै पीडितहरुसँग पहिलो चरणमा २१ लाख रुपैयाँ लिएको प्रहरीले जनाएको छ । पोर्चुगलमा मासिक एक लाख २० हजार रुपैयाँसम्म कमाइ हुने भन्दै पीडितसँग २१ लाख लिई सम्पर्कमा नवसी फरार भएको अवस्थामा पक्राउ परेको प्रहरीले जनाएको छ ।
उनलाई पनि उपत्यका अपराध अनुसन्धान कार्यालयबाटै खटिएको प्रहरी टोलीले सातदोबाटोबाटै पक्राउ गरेको हो । उनीहरु दुवै जनालाई वैदेशिक रोजगार विभागले पक्राउ गरी उपस्थित गराइदिन आग्रह गर्दै पत्राचार गरेपछि प्रहरीले पक्राउ गरेको हो ।
पक्राउ परेका दुवै जनालाई विभागमा बुझाइएको अपराध अनुसन्धान कार्यालयका सूचना अधिकृत प्रहरी उपरीक्षक कृष्णप्रसाद कोइरालाले जानकारी दिए ।
प्रकाशित मिति: शुक्रबार, मंसिर १६, २०७९ ०९:११
-1745656903.jpeg)