काठमाडौं- श्रम, रोजगार तथा सामाजिक सुरक्षा मन्त्रालयले वैदेशिक रोजगारीमा जाने कामदारको स्वास्थ्य परीक्षण गर्ने स्वास्थ्य संस्थाले पुस मसान्तभित्र नवीकरण गर्नुपर्ने जानकारी दिएको छ ।
मन्त्रालयले बिहीबार एक सूचना जारी गर्दै स्वास्थ्य संस्थाहरुलाई प्रत्येक आर्थिक वर्षको पुस मसान्तभित्र पाँच हजार रुपैयाँ नवीकरण दस्तुर बुझाई सूचीकरण नवीकरण गर्नुपर्ने कानुनी व्यवस्था रहेको उल्लेख गरेको छ ।
मन्त्रालयमा सूचीकृत भएका र सञ्चालनमा रहेका सबै स्वास्थ्य संस्थाहरुले वैदेशिक रोजगार नियमावली–२०६४ बमोजिम सूचीकरण नवीकरण गर्नुपर्ने मन्त्रालयले जनाएको छ ।
स्वास्थ्य संस्था नवीकरणका लागि सूचीकरण प्रमाणपत्रको प्रतिलिपि, आगामी पुस मसान्तसम्मका लागि सूचीकरण नवीकरण भएको प्रमाणपत्रको प्रतिलिपि, अघिल्लो आर्थिक वर्षको कर चुक्ता प्रमाणपत्रको प्रतिलिपि पेस गर्नुपर्ने उल्लेख छ ।
त्यस्तै अघिल्लो आर्थिक वर्षको लेखापरीक्षण प्रतिवेदनको प्रतिलिपि, स्वास्थ्य मन्त्रालय वा त्यसअन्तर्गतबाट स्वास्थ्य संस्था सञ्चालन स्वीकृतिको प्रमाणपत्र र नवीकरण भएको प्रमाणपत्रको प्रतिलिपि अनिवार्य पेस गर्नुपर्ने मन्त्रालयले जनाएको छ ।
मन्त्रालयले तोकिएको मापदण्डअनुरुप सर्त पूरा नगरेको खण्डमा नवीकरण नहुने र कारोबारसमेत रोक्का गर्ने चेतावनी दिएको छ । यसअघि पनि स्वास्थ्य संस्थाहरुलाई आवश्यक कागजातसहित सूचीकरणका लागि मन्त्रालयले आग्रह गरेको थियो ।
प्रकाशित मिति: शुक्रबार, मंसिर १६, २०७९ १०:५७
-1745656903.jpeg)