काठमाडौं- श्रम, रोजगार तथा सामाजिक सुरक्षामन्त्री शेरबहादुर कुँवरले वैदेशिक रोजगारीमा बढ्दै गएको बेथिति र ठगीका घटना रोक्न म्यानपावर व्यवसायीहरुलाई निर्देशन दिएका छन् ।
पछिल्लो समय वैदेशिक रोजगारीमा जाने नेपालीहरु ठगिने, श्रम शोषणमा पर्ने, सम्झौताविपरीतको काम गर्नुपर्ने अवस्थाबाट गुज्रिएको भन्दै व्यवसायीलाई यस्तो बेथिति रोक्न निर्देशन दिएका हुन् ।
मंगलबार श्रम मन्त्रालयमा म्यानपावर व्यवसायीसँग भएको छलफलमा मन्त्री कुँवरले वैदेशिक रोजगारीलाई मर्यादित र सुरक्षित बनाउन सबै उत्तरदायी हुनुपर्ने र मिलेर समस्याको समाधान गर्नुपर्ने बताए ।
छलफल कार्यक्रममा एक हजारभन्दा बढी कामदार मलेसिया पठाउने व्यवसायीहरुको सहभागिता रहेको मन्त्री कुँवरको सचिवालयले जनाएको छ । मलेसियमा जाने कामदारहरुको लागि ‘फ्रि भिसा, फ्रि टिकट’को व्यवस्थाविपरीत चर्को रकम असुलेका खबर सार्वजनिक भइरहेको भन्दै उनले यसको जिम्मेवार म्यानपावर व्यवसायी नै भएको बताए ।
‘सरकारले नीति नियम बनाएको छ, फ्रि भिसा फ्रि टिकटमा कामदार पठाउन श्रम सम्झौता गरेको छ,’ मन्त्री कुँवरले भने, ‘तर पनि सामान्य परिवारको व्यक्ति मलेसिया जान लाखौं रकम तिर्न बाध्य छ, यसमा हामी कडा अनुगमन गर्छौं, तपाईंहरुले पनि विशेष ध्यान दिनुहोला ।’
उनले वैदेशिक रोजगारीको क्षेत्रमा भइरहेको विकृतिलाई न्यूनीकरण गर्दै मर्यादित र सुरक्षित रोजगारीका लागि सरकारको तर्फबाट नीति नियम संशोधन गर्नेदेखि अनुगमनका पक्षलाई पनि कडाइका साथ लागू गर्ने जानकारी दिए । मन्त्री कुँवरले म्यानपावर व्यवसाय पनि राज्यको एक हिस्सा भएकाले यस क्षेत्रमा समस्या र व्यवसायीका मागलाई सम्बोधन गर्न सरकार बाधक नभएको बताए ।
तर, उनले वैदेशिक रोजगारीका नाममा ठगी गर्ने व्यक्ति र संस्थाहरुविरुद्ध कारबाही गर्नबाट सरकार पछि नहट्ने प्रतिबद्धता व्यक्त गरे ।मन्त्रालयका सचिव एकनारायण अर्यालले मलेसियाको रोजगारीलाई व्यवस्थित बनाउनका लागि सबै मिलेर अगाडि बढ्नुपर्नेमा जोड दिए । उनले पछिल्लो समय मलेसिया जाने नेपाली कामदार ठगिने समस्या धेरै आएकाले यसलाई व्यवस्थापन गर्नका लागि व्यवसायीलाई आग्रह गरे ।
साथै, सचिव अर्यालले मलेसियामा सहजरुपमा कामदार पठाउने विषयमा वैदेशिक रोजगार ऐनमा भएका केही अप्ठ्यारो बुँदालाई संशोधन गर्न मन्त्रालय तयार रहेको जानकारी दिए । वैदेशिक रोजगार विभागका महानिर्देशक उमाकान्त आचार्यले म्यानपावर कम्पनीविरुद्ध विभागमा आएका उजुरीले ध्यानाकर्षण भएको बताए ।
छलफलका क्रममा मलेसियामा कामदार पठाउँदा ‘फ्रि भिसा, फ्रि टिकट’मै पठाउने गरेको र बीचमा कामदारलाई ल्याउने एजेण्टका कारण बदनाम हुनुपरेको म्यानपावर व्यवसायीले बताए । उनीहरुले बिचौलियालाई रोक्नका लागि नीति नियम बनाउन पनि सरकारलाई आग्रह गरे ।
प्रकाशित मिति: बुधबार, मंसिर १४, २०७९ ०८:०१
-1745656903.jpeg)