काठमाडौं– नेपालीका लागि आकर्षक श्रम गन्तव्य रूपमा मानिने दक्षिण कोरियाप्रति युवाहरूको मोह बढ्दै गएको छ । तुलनात्मक रूपमा अन्य मुलुकभन्दा राम्रो कमाइ हुने भएपछि दक्षिण कोरियाप्रति युवाहरूको मोह बढ्दै गएको हो ।
प्रत्येक युवाहरूमा सानो र सुखी परिवार बनाउने सोच भएसँगै सुरक्षित र आकर्षक कमाइ गर्ने गन्तव्यको रूपमा स्थापित भएपछि बर्सेनि कोरियन भाषा परीक्षा दिने र पढ्नेको संख्यामा पनि वृद्धि भएको छ ।
कोरियाले रोजगार अनुमति प्रणाली (इपिएस) अन्तर्गत सन् २००८ देखि नेपाली युवालाई आफ्नो देशमा रोजगारीका लागि अवसर दिँदै आएको छ । जसमा २००८ देखि २०२० सम्मको तथ्यांकलाई हेर्दा बर्सेनि कोरियन भाषामा पढ्नेको संख्यामा वृद्धि भएको देख्न सकिन्छ ।
अहिलेको अवस्थामा अधिकांश युवामा औपचारिक शिक्षाभन्दा पनि विभिन्न भाषाहरू पढ्नेको संख्या धेरै देखिन थालेको छ । जसमध्ये कोरियन भाषा पढ्ने धेरै देखिन्छन् । तथ्यांकलाई हेर्दा सन् २०१९ मा ९३ हजार युवाले भाषा परीक्षाका लागि आवेदन दिएका थिए । सन् २०१८ को भाषा परीक्षाका लागि ८२ हजार २ सय ६४ ले आवेदन दिएका थिए । त्यस्तै, सन् २०१७ मा ६८ हजार ३ सय ८३ जनाले आवेदन भरेका थिए । यो तथ्यांकलाई हेर्दा बर्सेनि भाषा परीक्षा दिने विद्यार्थीको संख्या वृद्धि भएको देख्न सकिन्छ ।
त्यस्तै सन् २०१६ मा ६० हजार ६ सय २६ जनाले भाषा परीक्षा दिनका लागि आवेदन दिएका थिए । २०१५ मा ५१ हजार १ सय ३७, २०१४ मा ५८ हजार ७ सय ४६ र २०१३ मा ४४ हजार १ सय २२ जनाले आवेदन फारम भरेका थिए । सन् २०१२ मा भाषा परीक्षाका लागि आवेदन खुलेन ।
त्यस्तै, सन् २०११ मा ५० हजार ४३ जना आवेदन दिएका थिए । २०१० मा ३६ हजार २ सय ३ र २००८ मा ३१ हजार ५ सय २५ जनाले आवेदन दिएका थिए । जसमध्ये अहिलेसम्म ७० हजार ४ सय ६९ जनाले भाषा परीक्षा उत्तीर्ण गरे पनि ५८ हजार १ सय ३८ जनाले मात्र कोरिया जाने मौका पाएको इपिएसको तथ्यांक छ । जसमा करिब १२ हजार युवाहरू विभिन्न कारणले कोरिया जान पाएका छैनन् । तथ्यांकका अनुसार अहिलेसम्म महिलाको तुलनामा पुरुष दुई गुणा बढीले कोरिया गएका छन् ।
यसरी कोरिया गएका युवाहरूले ४ वर्ष १० महिनासम्म कामको अवसर पाउनेछन् । त्यस्तै, सोही अवधिमा एकपटक आफ्ना परिवारका सदस्यलाई कोरिया लैजान पाउने व्यवस्था छ । तर सन् २०१९ देखि भाषा र सीप गरी दुवै परीक्षा दिनुपर्ने व्यवस्था भएको छ । यसअघि कोरिया जानका लागि भाषा परीक्षा मात्र पास गरे पुग्थ्यो । २०१९ देखि भाषा परीक्षाको उत्पादनमूलक क्षेत्रको १०० अंक र कृषि तथा पशुपालन क्षेत्रको ९० अंकमा पढ्ने २० र सुन्ने २० गरी कुल ४० वटा प्रश्न हुने इपिएस शाखाले जनाएको छ । जसमा २५–२५ गरी ५० मिनेटको परीक्षा हुन्छ ।
त्यसैगरी, दोस्रो चरणको सीप परीक्षण उत्पादनमूलक क्षेत्रको १०० अंक र कृषि तथा पशुपालन क्षेत्रको ११० अंकको हुन्छ । त्यसैले भाषा र सीप परीक्षा दुवै पास भई कोरिया गएर राम्रो कमाएर परिवार र आफू आत्मानिर्भर बन्ने आसामा अहिले लाखौँ युवाहरू तन, मन र धन खर्चेर लागेका छन् । हाल २०२० मा अत्याधिक मानिसहरूको माग भएसँगै कोरियन भाषा पढ्ने विद्यार्थीहरूको भिड लाग्न थालेको भाषा इन्स्टिच्युटहरूले जनाएका छन् ।
प्रकाशित मिति: मंगलबार, माघ ७, २०७६ ०४:४९
-1745656903.jpeg)