दोहा– साउदीस्थित नेपाली दूताबासले अवैधानिक रूपमा रहेका नेपाली कामदारहरूलाई नेपाल फिर्तीमा सहजीकरण गर्न साउदीको विभिन्न सहरहरू नेपाली दूताबासले सेवा बिस्तार गरेको छ । साउदी सरकारले अकामाको म्याद सकेर एक महिनाभन्दा बढी अबधिमा नवीकरण नभएका वा नयाँ आएकाहरूको हकमा चार महिनाभन्दा बढी समयसम्म पनि अकामा नबनाइदिएकाहरूका साथै कम्पनी छाडी अवैधानिक रूपमा रहेका कामदारहरूलाई स्वदेश फर्कन दिइएको सुबिधालाई मध्य नजर गर्दै साउदीस्थित नेपाली दूताबासले दमाम, जुबेल, बुरैदा र ओनैजालगायत ठाउँहरूमा दूताबासको कर्मचारी र सहयोगीहरूमार्फत फर्म बुझिलिने जनाएको छ ।
फर्म बुझेपछि आबश्यक प्रक्रियाका लागि अघि बढाइने र सोहि बमोजिम एक्जिट भिसा साउदीस्थित सम्बन्धित निकायबाट प्राप्त हुने र स्वदेश फर्कन सक्ने दूताबासले विज्ञप्तिमार्फत जनाएको छ ।
पासपोर्ट नभएकाहरूको हकमा दूताबासले ट्राभल डकुमेन्ट बनाइदिने दूताबासले जनाएको छ । यस्तो सुबिधा लिन कुनै मुद्दा मामिला, दण्ड जरिवाना नभएको हुनु पर्ने जनाइएको छ ।
कम्पनी छाडेर भागेकाहरूले जेल बसेर मात्रै स्वदेश फर्कन पाउने विगतमा नियम भए पनि नयाँ नियमबमोजिम जेल नबसी स्वदेश फर्कन सकिने दूताबासले जनाएको छ । साउदी सरकारले अवैधानिक रूपमा रहेकाहरूलाई सहज स्वदेश फिर्तीका लागि विगत २०१३ र २०१७ मा पनि आममाफीको घोषणा गरेको थियो ।
प्रकाशित मिति: मंगलबार, माघ ७, २०७६ ०४:४३
-1745656903.jpeg)