काठमाडौं - वैदेशिक रोजगारीका लागि साउदी अरेबियामा रहेका ३८ जना नेपालीले ‘एक्जिट’ (बहिर्गमन) भिसा पाएका छन् । साउदीको अध्यागमन कार्यालयले जारी गरेको नयाँ नियमानुसार हुरुब (कम्पनी छोडेर भागेका) लागेका ३८ जनाले उक्त भिसा पाएका हुन् ।
एक्जिट भिसा प्राप्त गरेका व्यक्तिहरुले बढीमा एक हप्ताभित्र साउदी छोडिसक्नुपर्ने रियादस्थित नेपाली दूतावासले जनाएको छ । हुरुब लागेका नेपालीहरुलाई सात दिनभित्र साउदी छोड्न अनुरोध गर्दै अरुलाई पनि एक्जिट भिसाको म्याद हेर्न दूतावासले अनुरोध गरेको छ ।
एक हप्ताअगाडि नै एक्जिट भिसा आएको भन्दै दूतावासले आफ्नो मोबाइलमा सन्देश प्राप्त नभए दूतावास आएर एक्जिट भिसाको पेपर लैजान सकिने जनाएको छ ।एक्जिट भिसा प्रोसेसिङ निःशुल्क हुने र यसबापत एक हलाला पनि कहीँ कतै बुझाउनु नपर्ने दूतावासले उल्लेख गरेको छ ।
तर, एक्जिट भिसा आइसकेपछि नेपाल फर्किने हवाई टिकट व्यक्ति स्वयंले व्यवस्था गर्नुपर्ने जनाइएको छ । इकामा (बस्ने अनुमति)को म्याद सकिएको तीन महिनाभन्दा बढी भइसकेका वा साउदी आएको तीन महिनाभन्दा बढी समयसम्म पनि इकामा प्राप्त नगरेका वा हुरूब लागेका व्यक्तिको मात्र एक्जिट भिसा प्रोसेसिङ दूतावासले गरिदिने जनाइएको छ ।
त्यसैगरी, कुनै केस वा जरिवाना छ भने त्यसको छिनोफानो नभएसम्म एक्जिट भिसा नलाग्ने र भिसा दिने सम्पूर्ण अधिकार साउदीको अध्यागमन कार्यालयसँग मात्रै हुने दूतावासले प्रस्ट पारेको छ ।
प्रकाशित मिति: मंगलबार, मंसिर ६, २०७९ १८:०८
-1745656903.jpeg)