काठमाडौं- वैदेशिक रोजगारीका लागि कतार पुगेका नेपाली श्रमिकहरुलाई समयावधि सकिनु अगावै श्रम स्वीकृति नवीकरण गर्न कतारस्थित नेपाली दूतावासले अनुरोध गरेको छ ।
कतारमा रहेका नेपालीहरुलाई आफ्नो श्रम स्वीकृति अवधिको ख्याल गर्दै समयमै नवीकरण गरी आफू र आफ्नो परिवारले सरकारबाट पाउने कल्याणकारी सेवा सुविधा उपभोग गर्नबाट वञ्चित नहुन अनुरोध गरेको हो ।
दूतावासले सोमबार एक विज्ञप्ति जारी गर्दै वैदेशिक रोजगार ऐन, २०६४ बमोजिम अनिवार्य श्रम स्वीकृति नवीकरण गर्नुपर्ने प्रावधान रहेको जनाउँदै विदेशमा रोजगारीमा रहँदा भवितव्य परी मृत्यु भएमा श्रम स्वीकृति लिँदा वैदेशिक रोजगार कल्याणकारी कोषमा दाखिला गरेको रकम र विदेश जानुपूर्व नेपालमा नै गरेको बिमाबाट मृतकको शव व्यवस्थापन गर्ने र परिवारलाई कानुनले तोकेबमोजिमको सेवा सुविधा प्रदान गर्ने व्यवस्था रहेको उल्लेख गरेको छ ।
‘अन्यथाः श्रम स्वीकृतिको अवधि सकिएपछि विदेशमा कुनै पनि कारणले मृत्यु भएमा, अन्य कुनै घटना भई गम्भीर बिरामी भएमा वा अगंभंग भएमा कानुनबमोजिम वैदेशिक रोजगार कल्याणकारी कोषको रकम र बिमाबापतको रकम दाबी गर्न सक्ने कानुनी व्यवस्था नरहेको जानकारी गराइन्छ,’ विज्ञप्तिमा उल्लेख गरिएको छ ।
दूतावासले कतारबाटै श्रम स्वीकृति नवीकरण गर्न सकिने जानाएको छ । यसका लागि वैदेशिक रोजगार विभागको वेबसाइटमा लगइन गरी कतारबाटै श्रम स्वीकृति नवीकरण गर्न सकिने जनाइएको छ । रोजगारीमा रहेका श्रमिकहरुले नवीकरण गर्दा वैदेशिक रोजगार कल्याणकारी कोष र बिमाबापत दाखिला गर्नुपर्ने रकम कतारमा रहेको आफ्नो बैंक खाताबाट नेपालमा रहेको वैदेशिक रोजगार बोर्ड र सम्बन्धित बिमा कम्पनीको खातामा सोझै पठाउन सकिने दूतावासले उल्लेख गरेको छ ।
वैदेशिक रोजगारीमा जानेले एक पटक श्रम स्वीकृति लिई विदेश गएपछि श्रम स्वीकृतिको अवधि कायमै रहेको अवस्थामा नेपालमा फर्की पुनः सोही मुलुकको सोही काममा जाँदा पुनः श्रम स्वीकृति लिनु नपर्ने तर एक पटक लिएको श्रम स्वीकृतिको अवधि समाप्त भएपछि पुनः विदेशमा रोजगारीको लागि जानुपरेमा श्रम स्वीकृति नवीकरण गर्नुपर्ने वैदेशिक रोजगार ऐन, २०६४ ले व्यवस्था गरेको छ ।
श्रम, रोजगार तथा सामाजिक सुरक्षा मन्त्रालयले पनि एक हप्ताअघि एक विज्ञप्ति जारी गर्दै रोजगारीका लागि विदेश गएका सम्पूर्ण नेपालीहरुलाई श्रम स्वीकृतिको म्याद सकिनुअगावै नवीकरण गराउन सूचित गरेको थियो ।
विदेशमा रहेका नेपालीले आफ्नो श्रम स्वीकृतिको म्याद रहे÷नरहेको थाहा पाउन वैदेशिक रोजगार विभागको वेबसाइटमा गई जाँच गर्न सक्ने मन्त्रालयले जनाएको छ । समयमै श्रम स्वीकृति नवीकरण नगर्दा विदेशमा रोजगारीका सन्दर्भमा विभिन्न पीडा खेप्नुपर्ने, स्वदेश फर्कन कठिन हुने र कतिपय परिस्थितिमा जेल सजायसमेत भोग्नुपर्ने अवस्था आउने गरेको मन्त्रालयले उल्लेख गरेको छ ।
प्रकाशित मिति: मंगलबार, मंसिर ६, २०७९ ०८:०७
-1745656903.jpeg)