दोहा– नेपाली व्यवसायीहरूको संस्था नेपाली व्यवसायी संघ कतारले कतारमा श्रम स्विकृतिका लागि सहजीकरण गरिदिन कतारका लागि नेपाली राजदूत नारदनाथ भारद्वाजसँग आग्रह गरेको छ ।
नेपाल सरकार, वैदेशिक रोजगार विभागले श्रम स्विकृतिमा कडाइ गर्दै लाइसेन्स देखाउनु पर्ने, पहिलाको पद, नाम र हालको पद, नाममा फरक पर्ने भएमा इम्प्लोइमेन्टको करार देखाउनु पर्ने, श्रम कार्यालयमा स्वयं उपस्थित हुनु पर्नेलगायत झञ्झटिलो प्रक्रिया लागू गरेको भन्दै श्रम स्विकृतिका लागि सहजीकरण गरिदिन संघले राजदूत भारद्वाजसँग आग्रह गरेको हो ।
राजदूत भारद्वाजसँगको भेटमा नेपालबाट वैदेशिक रोजगारीको सिलसिलामा कतार आउँदा विभिन्न पेसामा रोजगारी गर्न कामदारको रूपमा कतार आएका व्यवसाय सुरु गरी धेरै नेपालीहरू व्यवसायीमा रूपान्तरण भएको व्यहोरा जानकारी गराएको संघका अध्यक्ष महेन्द्रप्रसाद चौलागाईले जानकारी दिएका छन् । ‘सीमित समयमा धेरै व्यवसायिक कार्यहरू गरेर पटक–पटक यात्रा गरिरहनुपर्ने व्यवसायीहरू झन्झटिलो तर बाध्यात्मक प्रक्रियाको कारण श्रम स्विकृति लिन कठिनाइ भोगिरहेका छौँ,’ अध्यक्ष चौलागाईले भने ।
श्रम स्विकृतिका कारण समस्या आएको जनाउँदै व्यवसायीहरूले वैदेशिक रोजगारमा आउँदा जुनसुकै काम वा पदको नाममा आएका भए तापनि हाल व्यवसाय गरिरहेका व्यवसायीहरूको उपयुक्त वर्गीकरण गरी वा कुनै विधि अपनाई झन्झटिलो प्रक्रिया अन्त्य गरेर सहज प्रक्रियाद्वारा श्रम स्विकृति दिने व्यवस्था गरी दिन राजदूत भारद्वाज समक्ष आग्रह गरेको संघले जनाएको छ ।
‘व्यवसायी पहिचाहानको आधार भनेको कतारको कम्पनी रजिष्ट्रार प्रमाणपत्रमा नाम उल्लेख हुनु हो तसर्थ त्यसैलाई आधार मानेर वा कुनै परिचयपत्र जारी गरेर वा व्यवसायीहरूको आधिकारिक सूची तयार गरेर कार्यान्वयन गर्न सकिने र त्यसका लागि नेपाली व्यवसायी संघ कतार आवश्यक समन्वय र सहजीकरण गर्न सदैव तत्पर रहेकोसमेत अध्यक्ष चौलागाइँले जनाएका छन् ।
-1745656903.jpeg)