दोहा(प्रस)– युएईमा नेपालीसहित अन्य विदेशी कामदार चढेको बस दुर्घटना हुँदा ३ जना नेपाली चेलीसहित ६ जनाको मृत्यु भएको युएईस्थित नेपाली दूताबासले जनाएको छ । एमबिएम कम्पनीको कामदार बोकेको मिनिबस आबुधाबीमा दुर्घटनामा परेको थियो ।
दुर्घटनामा परेको बसमा सरफाइ मजदुरका रूपमा कार्यरत १८ नेपाली चेलीसहित, अफ्रिका, श्रीलंकालगायत गरेर जम्मा २४ जना कामदार रहेका थिए । बस आबुधाबीको अल रहा क्षेत्रमा लरीमा ठोक्किएको थियो ।
दुर्घटनामा प्यूठानकी भावना कुँवर, झापाकी कृष्णकुमारी अधिकारी र बाराकी अमिसा मोक्तान तामाङको मृत्यु भएको दूताबासले जानकारी दिएको छ ।
दुर्घटनामा घाइते भएका सिन्धुपाल्चोककी माया तामाङ र सरिता थापा, झापाकी तुलसा थापा, पवित्रा गुरुङ र इलामकी सीता सुब्बाको एनएमसी अस्पतालमा उपचार भइरहेको छ । त्यसैगरी मकवानपुरकी रिता सिवाकोटी, झापाकी मुना राई, ललितपुरकी कमला नेपाली, दाङकी आशा घर्ती मगर र ठेगाना नखुलेकी सुजला विश्वकर्माको माफ्रक अस्पतालमा उपचार भइरहेको छ ।
त्यस्तै अलरहा अस्पतालमा मकवानपुरकी मिना सिंह, नुवाकोटकी सरिता तामाङ र सुनसरीकी वर्षा विश्वकर्माको उपचार भइरहेको दूताबासले जनाएको छ । मृत्युहरूको शव आवश्यक प्रक्रिया पूरा गरेर नेपाल पठाउने तयारी भइरहेको दूताबासले जनाएको छ ।
