काठमाडौं– युएईको अबुधाबीमा श्रमिकहरू बढेको मिनी बस दुर्घटना दुर्घटना हुँदा १८ जना नेपाली घाइते भएका छन् भने ६ जनाको मृत्यु भएको छ । युएईस्थित नेपाली दूताबासका अनुसार अबुधाबीमा बिहीबार बिहान करिब ५ः३० मा भएको दुर्घटनामा परेर उनीहरूको मृत्यु भएको हो ।
आबुधाबीको अल रहा भन्ने स्थानमा दुर्घटनामा परेर ६ जनाको मृत्यु भएको भए पनि यो समाचार तयार पार्दासम्म मृत्यु हुनेहरू कुन देशका नागरिक हुन् भन्ने खुलेको छैन । बसमा २४ जना सवार थिए । तीमध्ये १८ जना नेपाली भएको दूताबासले जनाएको छ । अन्य ६ जना श्रीलंका र अफ्रिकी मुुलुकका महिला कामदार रहेको बताइएको छ । सवार सबै सरसफाइ सम्बन्धी काम एमबिएम कम्पनीका कामदार हुन् । उनीहरू काममा गइरहेको अवस्थामा उक्त बस अगाडिको लहरीमा ठोकिएर दुर्घटना भएको बताइएको छ ।
दुर्घटनापश्चात युएईका लागि नेपाली राजदूत कृष्णप्रसाद ढकालसहित दूताबासको टिम घाइतेहरूलाई भर्ना गरिएको मरफाक अस्पताल पुगेको थियो । दूताबासले नेपाली काम गर्ने कम्पनीसँग सम्पर्क गरेको र थप जानकारी प्राप्त भएपछि अवगत गराउने बताएको छ ।
दुर्घटनामा १६ जना नेपाली घाइते भएको र तीमध्ये तीनजनाको अवस्था चिन्ताजनक भएकाले आइसियुमा राखिएको दूताबासले जनाएको छ । दूताबासका अनुसार घाइतेको उपचारका लागि आवश्यक सबै प्रक्रियामा सहयोग भइरहेको छ ।
घाइतेहरूको आबुधाबीको विभिन्न अस्पतालमा उपचार भइरहेको छ । घाइतेमध्ये ५ जना नेपालीको आबुधाबी खलिफा सिटीमा रहेको एनएमसी अस्पतालमा उपचार भइरहेको छ । अन्यको मफरक र अल रहा अस्पतालमा उपचार भइरहेको बताइएको छ ।
