काठमाडौं– वैदेशिक रोजगार विभागले १५ तारिखसम्म आएको मागपत्रलाई पुरानै तरिकाबाट पूर्वस्विकृत दिने भएको छ । यसअघि विभागले १ जनवरीदेखि वैदेशिक रोजगार सूचना प्रणाली (फेम्स्) लाई अनिवार्य रूपमा लागू गरे पनि विदेशस्थित अधिकांश कूटनीतिक नियोगहरूले लागू गर्न नसकेपछि बिहीबार विभाग र नेपाल वैदेशिक रोजगार व्यवसायी सघंबीच संयुक्त रूपमा छलफल गरी पुरानै तरिकाबाट पूर्वस्विकृति दिन लागेको हो ।
संघका महासचिव सुजित श्रेष्ठका अनुसार यसअघिका करिब ३ सय मागपत्र पूर्वस्विकृत निकाल्न नपाएको अवस्थामा विभाग र संघको संयुक्त छलफलमा १५ जनवरीसम्म आएको मागपत्रलाई पुरानै तरिकाबाट लाने र त्यसपछिको मागपत्रलाई फेम्समार्फत लैजाने सम्झौता भएको छ ।
जसअनुसार कवेत, युएई र कतारको कूटनीतिक नियोगबाट १५ जनवरीसम्म प्रमाणीकरण भएका मागपत्रलाई आफ्नै अनलाइनबाट अपलोड गर्न सकिने र वैदेशिक रोजगार सूचना व्यवस्थापन प्रणाली सञ्चालन कार्यविधि, ०७६ को दफा १९ (६) बमोजिम डिजिटल सिग्नेचर प्रयोग गरी पूर्वस्विकृतीका लागि अनलाइनबाटै पेस गर्नुपर्ने महासचिव श्रेष्ठले बताए । उनका अनुसार त्यसपछिको हकमा भने पूर्वसूचना बमोजिम नै नेपाली कूटनीतिक नियोगबाट मागपत्र प्रमाणीकरण मोड्युलबाटै पूर्वस्विकृति लिनुपर्नेछ ।
तर, यसअघि विभागले १ जनवरी २०२० देखि मागपत्रको प्रमाणीकरण (एटेस्टेसन) र श्रमिक छनोट (सेलेक्सन) प्रक्रियाको काम अनलाइन प्रणालीबाट लागू गरेको थियो । यो प्रणाली लागू भएसँगै विभागका महानिर्देशक डा.भीष्मकुमार भुषालले पनि खुसी हुँदै ठगीका कामहरू रोकिनुका साथै म्यानपावर व्यवसायीले फाइल बोकेर हिँड्ने समस्याको अन्य भएको बताएका थिए । त्यति मात्र होइन, यो प्रणालीबाट स्मार्टफोन चलाउन सक्ने जोसुकै कामदारले वैदेशिक रोजगारीका लागि अन्तिम स्विकृति लिइसकेपछि उसले काम गर्नुपर्ने कम्पनी, कामको प्रकृति, तलब सुविधा, पठाउने म्यानपावर एजेन्सी, जाँदा लाग्ने लागत खर्चको विवरण घरैबाट थाहा पाउन सक्ने विभागले जनाएको थियो ।
प्रकाशित मिति: शुक्रबार, माघ ३, २०७६ ०४:५५
-1745656903.jpeg)