काठमाडौं– वैदेशिक रोजगार विभागले सूचना व्यवस्थापन प्रणाली (फेम्स) भित्र थपेका मागपत्र प्रमाणीकरण तथा कामदार छनोट मोड्युल कार्यान्वयनमा समस्या देखा परेको छ । अंग्रेजी नयाँ वर्षदेखि अनिवार्य गरिएको मागपत्र प्रमाणीकरण तथा कामदार छनोट मोड्युललाई विदेशस्थित नेपाली कूटनीतिक नियोगहरूले लागू नगर्दा समस्या उत्पन्न भएको हो ।
विभागले मागपत्र प्रमाणीकरण मोड्युल तथा कमदार छनोट मोड्युल प्रणालीबाट आएका मागपत्र मात्र विभागमा मान्य हुने प्रावधानले व्यवसायीका साथसाथै श्रमिकलाई पनि समस्यामा परेको बताइएको छ । विभागले अनलाइन प्रणालीबाट मागपत्र प्रमाणीकरणका लागि वैदेशिक रोजगार सूचना व्यावस्थापन प्रणाली (फेम्स) भित्र थपिएको मागपत्र प्रमाणीकरण मोड्युल तथा कमदार छनोट मोड्युललाई केही देशबाहेकले लागू गर्न सकेका छैनन् ।
२०२० जनवरी १ देखि एटेस्टेसन मोड्युल अवलम्बन गरी प्रमाणीकरण गरी फेम्समा दाखिल गरिएका विद्युतीय कागजातहरू उपर मात्र विभागले अनलाइन प्रणालीबाट श्रम स्विकृतिका लागि कारबाही प्रक्रिया अघि बढाउने जनाइसकेको छ ।
फेम्स लागू गर्न विदेशस्थित कूटनीतिक नियोगहरूलाई १२ डिसेम्बरमा परराष्ट्र मन्त्रालयको च.न. ५७६३ साथै २६ डिसेम्बरमा विभागको च.न.७१७ को पत्रबाट पत्रचार गरे तापनि विभागले अनिवार्य गरेको १५औँ दिनसम्म मलेसिया, युएई, र कतारस्थित नेपाली कूटनीतिक नियोगले मात्र कार्यान्वयन ल्याएको वैदेशिक रोजगार कार्यालय काठमाडौंका शाखा अधिकृत सुरेश जोशीले बताएका छन् ।
मागपत्र प्रमाणीकरण मोड्युल तथा कमदार छनोट मोड्युल अनलाइन प्रणालीबाट सञ्चालनमा ल्याउने प्रक्रिया नेपालका निम्ति विल्कुलै नयाँ भएकाले कार्यान्वयन हुन समय लाग्ने र कार्यान्वयनमा सामेल नभएका नियोगहरूले मोड्युलको पूरा जानकारी संकलन गरी छिट्टै सामेल हुने अपेक्षा रहेको शाखा अधिकृत जोसीले बताए ।
१५ भदौ ०७५ मा तत्कालिन श्रम, रोजगार तथा सामाजिक सुरक्षामन्त्री गोर्कण बिष्टले १५ असोजबाट सञ्चालनमा आउने जानकारी दिँदै वैदेशिक रोजगार सूचना व्यवस्थापन प्रणाली (फेम्स) को उद्घाटन गरेका थिए ।
वैदेशिक रोजगारमा गएका कामदारहरूको फोटो र बायोमेट्रिकसहितको विस्तृत विवरण रहने साथै वैदेशिक रोजगार सम्बन्धी सम्पूर्ण गुनासा र उजुरीहरूको पनि विद्युतीय अभिलेख रहने, त्रिभुवन अन्तर्राष्ट्रिय विमानस्थलस्थित श्रम कक्षमा श्रम स्टिकर र बायोमेट्रिक विवरण रुजु गर्न एवं श्रम स्विकृति प्रदान गर्ने कार्यमा संलग्न सम्पूर्ण कर्मचारीहरूको कार्यसम्पादनको विवरण विद्युतीय रूपमा राख्ने उद्देश्यका साथ फेम्स सञ्चालनमा ल्याइएको र आवश्यकता अनुसार परिमार्जित गर्दै आइएको शाखा अधिकृत जोशीले बताए ।
प्रकाशित मिति: बिहीबार, माघ २, २०७६ ०४:४७
-1752335779.jpg)
