काठमाडौं– वैदेशिक रोजगार विभागमा ५३ जना लाइसेन्सप्राप्त मेलमिलापकर्ता सूचीकरण भएका छन् । यसअघि विभागले मेलमिलापकर्ताका लागि मान्यता प्राप्त व्यक्ति र संस्थालाई सूचीकृत हुन १५ दिनको समय दिएर निवेदनको माग गरेकामा ५३ जनाले बुधबार सूचीकरण भएका हुन् ।
मेलमिलापको माध्यमबाट ठगीलाई कम गर्ने हेतुले अब उजुरीकर्ता र आरोपितहरूले रोजेको मेलमिलापकर्ताबाट परेको उजुरीमा छलफल गरी क्षतिपूर्ति पाउनु पर्ने भए क्षतिपूर्ति अंकमा सहमत भई मेलमिलाप गर्न सक्ने विभागका महानिर्देशक डा.भीष्मकुमार भुषालले बताएका छन् । उनका अनुसार यो नयाँ अभ्यासले न्यायाधीकरणमा मुद्दा पठाउनै पर्ने अवस्थाको अन्त्य भई पीडितले छिट्टै राहत पाउने छन् ।
यसअघि विभागमा न्यायाधीकरणमा मुद्दा पठाउनै पर्ने झन्झटिलो अवस्था थियो । त्यति मात्र होइन, विभागमा उजुरीकर्ता र आरोपितहरू सहज रूपमा सहमत भएर समस्या समाधान गर्ने र बाहिर गएर विभागमा सहमति गर्न बाध्य बनाइयो भन्ने गुनासोेहरू आउने गरेकाले अब यो अवस्थाको अन्त्य भई पीडितले चाँडै राहत पाउने महानिर्देशक डा.भुषालले बताए ।
त्यसैले केही दिनअघि विभागले एक सूचना जारी गर्दै मेलमिलापकर्ताको रूपमा सूचीकरण हुन चाहने व्यक्ति र संंस्थालाई १५ दिनभित्र निवेदन दिन भनेको थियो । जसमा तालिम प्राप्त, अनुभवी व्यक्ति र संस्थाले निवेदन दिएर सूचीकृत भएकालाई मेलमिलाप सम्बन्धी नियमावाली, ०७० को नियम ३ को उपनियम २ बमोजिम पारिश्रमिको व्यवस्था हुने विभागले जनाएको छ ।
प्रकाशित मिति: बिहीबार, माघ २, २०७६ ०४:४३
-1745656903.jpeg)