काठमाडौं– इपिएसमार्फत कोरियामा जान चाहने कामदारहरूले एकपटक भाषा परीक्षा उत्तीर्ण गरेपछि पुनः परीक्षा दिनु नपर्ने भएको छ । वैदेशिक रोजगार विभागका महानिर्देशक डा.विष्णुकुमार भुषालको कार्यकक्षमा ई.पी.एस. सेन्टर नेपालका निर्देशक पार्क सुङ हि, इपिएस शाखाका निर्देशक कृष्णप्रसाद खनाल र इपिएस सेन्टरका व्यवस्थापक मुनाल राईसहितको मंगलबार बसेको बैठकले यस्तो निर्णय गरेको हो ।
बैठकले सन् २०१९ मा भाषा परीक्षा पास भएको विद्यार्थीले पुनः भाषा परीक्षा दिन नपर्ने व्यवस्थामा गरे पनि यसको निर्णय भने एचआरडी कोरियाको हेडक्वार्टरबाट मात्र हुने विभागद्वारा जारी सूचनामा उल्लेख गरिएको छ ।
त्यसो त एचआरडी कोरियाले हालै सार्वजनिक गरेको सीप परीक्षणको नतिजा पारदर्शी नभएको भन्दै विद्यार्थीहरू आन्दोलनमा उत्रिएपछि वैदेशिक रोजगार विभाग इ.पि.एस शाखा छलफलमा जुटेको हो ।
आन्दोलनकारीका अनुसार २०७६ जेठ २६ र २७ गते भएको भाषा परीक्षामा उत्तीर्ण भएको विद्यार्थीहरूले दोस्रो चरणको सीप परीक्षा त्रुटीपूर्ण भएको भन्दै वैदेशिक रोजगार विभाग र ई.पी.एस. कार्यलयमा सीप परीक्षणको नजिता खारेज गर्न माग गरेपछि बैठक बस्दै विभागले यो सहित तीन वटा निर्णय गरेको पनि सूचनामा उल्लेख छ ।
२०१९ मा सीप परीक्षामा उत्तीर्ण भएको विद्यार्थीको नतिजा सिस्टममा अपडेट नभएकाले त्रुटीहरूमा पुनरावलोकन गरेर एचआरडीबाट अन्तिम नतिजा सार्वजनिक गराएको जनाएको छ ।
त्यस्तै, रि–मेडिकल गरेका रि–रोस्टर इन्ट्री छिटो एप्रुभ गर्ने ,कृषि र पशुपालन क्षेत्रको रोस्टरमा रहेको एलसी र इस्यूलाई प्राथमिकता दिने, उत्पादनमूलक क्षेत्रको रोस्टरको इन्ट्री छिटो गर्ने, सीप परीक्षामा भएको टेस्टको अंक उपलब्ध गराउन एचआरडीलाई अनुरोध गर्ने निर्णय भएको सूचनामा उल्लेख छ ।
एचआरडीले यसवर्ष भएको लिखित परीक्षामा १२ हजार १० जना विद्यार्थीले उत्तीर्ण गरे पनि ६ हजार ७ सय ७३ जनालाई मात्र सीप परीक्षामा पास गराएको थियो । तर सीप परीक्षामा फेल भएका विद्यार्थीहरूले सीप परीक्षाको न्यायोचित मूल्यांकन नभएको, कम क्षमता भएको विद्यार्थीहरूले धेरै अंक ल्याएको र उच्च क्षमता भएको विद्यार्थीहरू फेल भएको भन्दै सीप परीक्षाको नजिता खारेज गर्न माग गरेका थिए । त्यसो त सीप परीक्षामा छनोट गर्दा सीप परीक्षाको एक व्यक्तिको बारेमा तयार पारिएको भिडियो कोरियाको रोजगार केन्द्रमा जान्छ र रोजगारदाताले उक्त भिडियो हेरेर छान्ने प्रक्रिया रहेको इपिएस शाखाले जनाएको छ ।
