काठमाडौं– वैदेशिक रोजगार व्यवसायी संघले वैदेशिक रोजगार विभागका महानिर्देशक भीष्मकुमार भूसालसँग भेट गरेर विभिन्न समस्यामाथि ध्यानाकर्षण गराएको छ । भेटमा संघका महासचिव सुजितकुमार श्रेष्ठले तीन महिना अवधिभित्र म्यानपावर कम्पनीका फाइलसहितको आवश्यक कागजातलाई विद्युतीय माध्यममा रूपान्तरण गरी सेवाग्राही र कर्मचारीबीच हुन सक्ने आर्थिक लेनदेन हटाउने सवालमा सौहाद्र्रपूर्ण तवरमा विभागका महानिर्देशक भूषालसँग वार्ता भएको जानकारी दिए ।
यसैगरी पूर्वस्विकृतिलाई अनलाइन पद्धतिमार्फत प्राप्त गर्ने व्यवस्थाका साथै व्यवसाय गरेर खान पाउने नागरिकको संवैधानिक अधिकारलाई ध्यान दिँदै वैदेशिक रोजगार व्यवसायीले अभिमुखीकरण तालिमलगायत व्यवसाय निर्वाध रूपमा गर्न पाउनुपर्ने विषयमा छलफल भएको जनाए । वैदेशिक रोजगार व्यवसायसँग नयाँ निर्णय गर्दा विभागले व्यवसायिक हकअधिकारको लागि निर्वाचित नेपाल वैदेशिक रोजगार व्यवसायी संघसँग वार्ता र संवादको माध्यमबाट निर्णय गरेको खण्डमा कार्यान्वयनमा सहजता हुने अपेक्षा आफूहरूले राखेको जनाए ।
यसैगरी भेटमा संघले समस्या समाधानका लागि परामर्श, संवाद र सहकार्यले नै आपसी विश्वास सिर्जना गर्ने भएकाले विभागले गर्ने हरेक नीति निर्माणमा व्यवसायीलाई अपनत्तवको भाव सिर्जना भएको खण्डमा सार्थक परिणाम आउने भन्दै सो वाावरण निर्माणमा लागिपर्न विभागलाई संघले सुझाव दिएको बुझिएको छ ।
त्यसैगरी, संघले वैदेशिक रोजगार विभागमा दर्ता रहेका सबै ८ सय ५४ म्यानपावर व्यवसायीलाई अनुशिक्षण तालिम प्रदान गरिनुपर्ने, राष्ट्र बैंकले जारी गरेको दश लाखभन्दा माथिको कारोबारमा बैंकिङ प्रणालीबाट गर्ने व्यवस्था भए पनि विभागले जुनसुकै कारोबार बैंकमार्फत गर्न बाध्य पार्दा त्यसले कामदार र व्यवसायी दुवैलाई अनावश्यक बोझ थपिएको भन्दै विभागको ध्यानाकर्षण गरेको जनाएको छ ।
यसैगरी, विभागले वैदेशिक रोजगारलाई मर्यादित बनाउन चालेको अभियानको स्वागत गर्दै विभागले जारी गरेका प्रमाणपत्रलगायत व्यवसायजन्य कागजपत्र विभाग र सो मातहतका कार्यालय मै हुने भएकाले तारन्तार व्यवसायीहरूलाई कागजात मागेर अनावश्यक तनाव दिन नहुने, विभागको कार्य सञ्चालनमा मन्त्रिपरिषद्बाट पारित कार्य सञ्चालन निर्देशिका थाती रहेको अवस्थामा फेरि पनि अन्य २४ प्रकारका कागजात मागिनु औचित्यहीन भएको भन्दै वैदेशिक रोजगार व्यवसायी संघले उल्लेखित विषयमा सहज किसिमको हुने गरी संशोधन गर्नसमेत माग गरेको महासचिव श्रेष्ठले जानकारी गराएका छन् ।
व्यवसायीसँगको भेटपछि महानिर्देशक भुषालले व्यवसायीको सुझाव र सल्लाहलाई मनन् गर्दै अघि बढ्ने भन्दै विभागले वैदेशिक रोजगारलाई व्यवस्थित र मर्यादित बनाउन चालेको अभियानलाई साथ दिन संघलाई सुझाएको बताइएको छ ।
प्रकाशित मिति: बुधबार, मंसिर ११, २०७६ ०८:१२
-1745656903.jpeg)