काठमाडौं– वैदेशिक रोजगारका क्रममा साउदी अरबमा रहेका नेपालीहरूलाई आफ्नो काम नछाड्न साउदी अरबका लागि नेपाली राजदूताबासले आग्रह गरेको छ । दूताबासले साउदी आएको केही हप्ताभित्र नै कम्पनी राम्रो नरहेको, भनेअनुसारको सुविधा नदिएको, मेडिकल नगरेको, मेसको खानाले आफूलाई सञ्चो नभएको, बिरामी हुँदा कम्पनीले उपचार नगरेकोलगायत कारण देखाई काम छाड्ने नेपालीहरूको संख्या बढेको भन्दै नेपाली दूताबासले एक सूचना जारी गर्दै संयमित रहन आग्रह गरेको हो ।
दूतावासले रोजगारको क्रममा साउदी आइसकेपछि सोही देशको रोजगारको कफला पद्धतिको भूमिकाको बारेमा थोरै भए पनि जानकारी राख्न अनुरोध गरेको छ । कामदारहरूलाई काम नपरेको खण्डमा अकस्मात काम नछाड्नसमेत उसले आग्रह गर्दै त्यसो गरेको खण्डमा समस्या समाधान हुनेभन्दा पनि जटिलता थपिनेतर्फ इंगित गर्दै राजदूताबासले सजग रहन अनुरोध गरेको छ ।
यसका साथै कुनै समस्या परेको खण्डमा तत्काल आफ्नो समस्या राजदूताबासमा राख्नसमेत आह्वान गर्दै काम र आवास नछाड्नसमेत भनेको छ । समस्या समाधानको दिशामा राजदूताबासले रोजगारदाता र कामदारलाई नेपालबाट पठाउने म्यानपावर व्यवसायीले गर्ने सहयोगमा निर्भर रहने पनि सूचित गराएको छ ।
साथै, राजदूताबासले समस्या राख्दा बढाइचढाइ गरेर दोषारोपण मात्र गर्ने कार्य राम्रो नभएको भन्दै यथार्थ समस्या राख्नसमेत आग्रह गरेको छ । नेपालका म्यानपावर कम्पनीका प्रतिनिधिले स्वदेशमा भनेको मौखिक कुरा भन्दा पनि आफूले श्रम सम्झौता पत्रमा के बोकेर आएको थिएँ भन्नेसमेत हेक्का राख्न दूताबासले साउदी रोजगारीमा पुगेकाहरूलाई आग्रह गर्दै सोहीअनुसार पत्रमा रोजगारी र सेवा सुविधा भए नभएको पनि गम्भीर भएर हेर्न अनुरोध गरेको छ ।
गतवर्षको तुलनामा नेपालीहरू चोरीका घटनामा संलग्न भई आरोप लागेर जेल पर्नु परेको भन्दै त्यसखाले गतिविधिमा ठूलो धनराशी कम्पनी वा काफलालाई बुझाउनु परेको घटनाहरू उल्लेख्य संख्यामा आउन थालेको भन्दै दूताबासले चिन्तासमेत व्यक्त गरेको छ । यसखाले कार्यमा संलग्न नहुन एवं कार्यस्थलमा अत्यन्त चनाखो र सजग हुन र एटिएम बुथ वरपर लामो समय नबस्नसमेत अपिल गरेको छ ।
लामो समय एउटै कम्पनीमा काम गरेका नेपालीहरूले सेवा करार समाप्त गरी स्वेदश फर्कने बेलामा केही कम्पनीहरूले विभिन्न बाहनामा कम्पनीबाट पाउने सुविधाहरू नदिने, महिनौँ सम्मको तलब नदिने, अकमा नवीकरण नगरिदिनेलगायत प्रवृत्तिहरू प्रशस्त देखिएको भन्दै दूताबासले समयमै चनाखो भई आफ्नो समस्याको बारेमा साउदी श्रम कार्यालयमा निवेदन दिन र सोको लिखित जानकारी राजदूताबास समक्ष उपलव्ध गराउन पनि अपिल गरेको छ ।
सूचनामा उक्त प्रकारका निवदेनउपर श्रम कार्यालयमा ताकेता गरी धेरै जनाको तलब सुविधाहरू प्राप्त भएको पनि अवगत गराएको छ । यसर्थ सेवा अवधि सकिएपछि आफूले पाउने तलब तथा सुविधाहरू कम्पनीले दिने बहानाबाजी वा आलटाल गरेको खण्डमा तत्काल श्रम कार्यालयमा निवेदन नदिई आफूले पाउने सर–सुविधा नलिई घर फर्कने हतारो मात्र नगर्नसमेत अनुरोध गरेको छ ।
यसका साथै कतिपय नेपालीहरूको परिचयपत्र अकामा प्रयोग गरी विदेशीहरूले आपराधिक गतिविधिमा रकम पठाएका कारण नेपालीहरूले सोको सजाय भोग्न परेकोतर्फ पनि राजदूताबासले सूचनामार्फत सजग गराएको छ ।
सोही कारण अकामालाई त्यस्ता खाले गतिविधिमा प्रयोग हुन दिनबाट जोगाउन आफैँ सचेत रहन आग्रह गर्दै यदि कथंकदाचित हराएको खण्डमा तुरुन्त प्रहरीलाई खवर गर्नुको साथै अन्य कसैलाई पनि अनावश्यक रूपमा अकामा सक्कल वा नक्कल फोटोकपी नदिनु हुनसमेत दूताबासले आग्रह गरेको छ ।
त्यसैगरी आफू कार्यरत मुलुकको स्थानीय कानुनको जानकारीका साथै पालना र सम्बन्धित देशको धर्म, संस्कृति र परम्पराको सम्मान गर्न हुनसमेत सचेत गराएको छ ।
प्रकाशित मिति: सोमबार, कात्तिक २५, २०७६ ०७:४८
-1745656903.jpeg)