शशिशेखर घिमिरे
काठमाडौं– आप्रवासी कामदारको अधिकार संरक्षणलाई जोड दिने उद्देश्यले आउँदो कात्तिक २६ देखि २८ गतेसम्म काठमाडौंमा अन्तर्राष्ट्रिय सम्मलेन हुने भएको छ । राष्ट्रिय मानवअधिकार आयोगले आप्रवासी कामदारहरूको अधिकार संरक्षणलाई प्राथमिकतामा राख्दै उक्त सम्मलेन गर्न लागेको जनाएको छ ।
सम्मेलनले आप्रवासी कामदारहरूको समस्या समाधानको दीर्घकालीन उपायको खोजी गर्दै कामदार पठाउने र लिने मुलुकका प्रतिनिधिहरू सहभागी हुन जनाइएको छ ।
उक्त सम्मलेनमा दक्षिण एसिया, एसिया प्रशान्त क्षेत्र, अफ्रिका, दक्षिण अमेरिका र युरोप क्षेत्रका राष्ट्रिय मानवअधिकार संस्थाका प्रमुख तथा आयुक्तहरू पनि सहभागी हुने कार्यक्रम रहेको छ । राष्ट्रिय मानव अधिकारको आयोगका सदस्य तथा सम्मेलनका संयोजक सुदीप पाठकले सम्मेलनमा गन्तव्य मुलुकका सरकारी निकायका प्रतिनिधिहरू, गैरसरकारी संस्थाका प्रतिनिधिहरू, आप्रवासन क्षेत्रका विज्ञहरू समेत गरी ३० देशका सरोकारवाला पक्ष सहभागी हुने जनाए ।
सम्मेलनमा अफ्रिकी राष्ट्र केन्या र मोरक्को, एसियाप्रशान्त मुलुकहरूबाट फिलिपिन्स, मलेशिया, कतार, युएई, बहराइन, थाइल्यान्ड, मंगोलिया, अष्ट्रेलिया, न्युजिल्यान्ड, भारत, बंगलादेश, माल्दिभ्स, श्रीलंका, जर्मन, मोरिसस लगायतका २५ मुलुकहरूको सहभागिता रहने उल्लेख छ ।
आप्रवासी सम्मेलनमा मूलतः वैदेशिक रोजगारमा कामदार पठाउने मुलुक, लिने मुलुक र सम्बन्धित देशका मानवअधिकार आयोगका प्रतिनिधि, कर्मचारी ट्रेड युनियनका प्रतिनिधिको सहभागिता हुने उल्लेख छ । साथै सम्मेलन आप्रवासीहरूको अधिकार संरक्षण र समस्या समाधानको दीर्घकालीन उपायको खोजी गर्ने तर्फ केन्द्रित हुने पाठकले बताए ।
विशेषगरी, नेपाली कामदारको बारेमा रोजगार गन्तव्य मुलुकमा मानवअधिकार आयोगको टोली जाँदा ज्यादा समस्या सुनिने गरेकोतर्फ ईगिंत गर्दै पाठकले आउँदो सम्मेलनले कामदार पठाउने र लिने मुलुक र काम गर्ने संस्थाका कारण आप्रवासी कामदाहरूलाई परेको समस्याको कारण खोतल्दै समाधानको दिशातर्फ उन्मुख हुने बताए ।
सम्मेलनमा आप्रवासी कामदारहरूको मानवअधिकार संरक्षणका विषयमा राष्ट्रिय तथा अन्तर्राष्ट्रिय विज्ञहरूबाट प्रस्तुत कार्यपत्रलाई आधार मानेर प्राप्त विषयलाई गहन छलफल गरि बुँदागत रूपमा अघि बढ्ने जनाइएको छ । साथै सम्मेलनले सरोकारवाला निकायको माध्यमवाट समस्या समाधानको उपायहरू समेत संलग्न गरी काठमाडौं घोषणापत्र जारी गरिने पनि जनाइएको छ । सन् २०१२ को नोभेम्बरमा काठमाडौंमा राष्ट्रिय मानवअधिकार आयोगले आप्रवासी कामदारको अधिकारसम्बन्धी पहिलो अन्तर्राष्ट्रिय सम्मेलन गरेको आठ वर्षपछि दोस्रो सम्मेलन हुन लागेको हो ।
