काठमाडौं– नेपाल राष्ट्र बैंकले वैदेशिक रोजगारीमा गएका नेपाली श्रमिकहरुलाई लक्षित गर्दै ५० करोड रुपैया“ बराबरको वैदेशिक रोजगार बचतपत्र बिक्री गर्ने भएको छ । राष्ट्र बैंकले पा“च वर्ष अवधिका लागि उक्त बचतपत्र बिक्री गर्न लागेको हो । यो बचतपत्रमा वैदेशिक रोजगारीको सिलसिलामा विभिन्न मुलुकमा रहेका नेपाली नागरिक, विदेशबाट फर्किएका र गैरआवासीय नेपालीहरुले लगानी गर्नसक्ने राष्ट्र बैंकले जानकारी दिएको छ ।
राष्ट्र बैंकको मौद्रिक व्यवस्थापन विभागका उपनिर्देशक विष्णुकुमार विश्वकर्माका अनुसार यो बचतपत्रमा लगानी गर्ने लगानीकर्ताले वार्षिक १२.५ प्रतिशतका दरले ब्याज पाउने छन् । बचतपत्र खरिदकर्तालाई ६–६ महिनामा ब्याज प्रदान गरिने उनले बताए । साथै, लगानीकर्ताले पछि बचतपत्र फिर्ता गर्न चाहेमा बैंक तथा वित्तीय संस्था वा राष्ट्र बैंकबाट जुनसुकै बेला फिर्ता गर्न सकिने उपनिर्देशक विश्वकर्माले बताए ।
यो बचतपत्रको बिक्री यही १८ जेठदेखि आगामी ६ असारसम्म खुला गरिने राष्ट्र बैंकले जानकारी दिएको छ । ‘विदेश गएका, विदेशबाट फर्किएका, विदेश गएका परिवारका सदस्य तथा गैरआवासीय नेपालीले न्यूनतम १० हजार रुपैया“ बराबरको बचतपत्र खरिद गर्न सक्ने छन्,’ विश्वकर्माले भने । विदेशबाट फर्किएकाको हकमा छ महिना बितेकाहरुले भने यस प्रक्रियामा सहभागी हुन नपाउने राष्ट्र बैंकले जनाएको छ ।
वैदेशिक रोजगार बचतपत्र लिन चाहने व्यक्तिले सरकारले निर्धारण गरेको प्रक्रियामार्फत विदेशबाट पैसा पठाएको प्रमाणित हुने कागजात पेस गर्नुपर्नेछ भने परिवारका सदस्यको थप नाता प्रमाण पनि पेस गर्नुपर्नेछ । यसको लागि विद्युतीय प्रणालीमार्फत आफूले चाहेको मूल्य बराबरको बचतपत्रको आवेदन दिन सकिने उपनिर्देशक विश्वकर्माले बताए ।
नेपालबाट विदेश जानेको संख्या बढ्न थालेपछि सरकारले वैदेशिक रोजगार कार्यविधि २०६४ अनुसार २०६६÷६८ सालबाट वैदेशिक रोजगार बचतपत्र बिक्री गर्न थालेको विश्वकर्माले जानकारी दिए । ‘सरकारले यस वर्ष २३९ अर्ब आन्तरिक ऋण उठाउने नीति लिएअनुरुप वैदेशिक रोजगार बचतपत्रमार्फत ५० करोड संकलन गर्ने लक्ष्य लिएको छ,’ उनले भने, ‘यसबाहेक सरकारले ट्रेजरी बिल, विकास ऋणपत्र, नागरिक बचतपत्रलगायत औजारमार्फत पनि आन्तरिक ऋण उठाउने गर्छ ।’
वैदेशिक रोजगार बचतपत्र चालु आवका लागि यो नै अन्तिम हुने भएकाले इच्छुक व्यक्तिहरुले आफूले चाहेको मूल्य बराबरको बचतपत्र लिनसक्ने विश्वकर्माले बताए । यसका लागि राष्ट्र बैंकको वेबसाइटमार्फत् अनलाइन आवेदन दिने व्यवस्था गरिएको उनले जानकारी दिए ।
