काठमाडौं– आउँदो कात्तिकमा काठमाडांैमा आप्रवासी कामदारको मानव अधिकार संरक्षणको विषयमा अन्तर्राष्ट्रिय सम्मेलन हुने भएको छ । वैदेशिक रोजगारीका क्रममा हुने मानव अधिकार सम्बन्धी समस्याको समाधान गर्ने उद्देश्यले कात्तिक २६ देखि २८ गतेसम्म अन्तर्राष्ट्रिय सम्मेलन हुने भएको हो । सम्मेलनमा दक्षिण एसिया, एसिया प्रशान्त क्षेत्र, अफ्रिका, दक्षिण अमेरिका र युरोप क्षेत्रका राष्ट्रिय मानवअधिकार आयोगका प्रमुख आयुक्तहरूको सहभागिता रहने बताइएको छ ।
यस्तै राष्ट्रिय मानव अधिकार संस्थाहरूको विश्व सञ्जालका प्रमुख, गन्तव्य देशका सरकारी निकायका प्रतिनिधि, गैरसरकारी संस्थाका प्रतिनिधि र आप्रवासन क्षेत्रका विज्ञहरूको पनि सहभागिता रहने जनाइएको छ । सम्मेलनमा ३२ देशबाट अन्तराष्ट्रिय संस्थाका प्रतिनिधिहरूको सहभागिता रहने आयोगले जनाएको छ ।
नेपाल तथा दक्षिण एसियाबाट लाखौँको संख्यामा कामदारहरू खाडीलगायत अरु देशहरूमा रोजगारीका लागि जाने गरेको अवस्थामा उनीहरूका साझा समस्यालाई यस सम्मेलनले सम्बोधन गर्ने अपेक्षा गरिएको छ । सम्मेलनले काठमाडौं घोषणापत्र जारी गर्ने छ ।
