काठमाडौं– गैरआवासीय नेपालीहरूले नेपालमा एक हजार डलर पठाउने भएका छन् । गैरआवसीय नेपाली संघ (एनआरएनए)ले पछिल्लो समय मुलुकमा देखिएको विदेशी मुद्रा सञ्चितिको समस्या समाधानमा सहयोग पुर्याउन नेपालको बैंक खातामा एक हजार डलर पठाउने अभियान सञ्चालन गर्ने भएको हो ।
एनआरएनएका पदाधिकारीहरूले नेपाली बैंकमा खाता खोलेर डलर पठाउने प्रतिबद्धता जनाएका छन् । संघका कार्यकारी अध्यक्ष कुल आचार्यको अध्यक्षतामा सम्पन्न बैठकले विदेशी मुद्रा (डलर) को कमीलाई कम गर्न एनआरएनएले विदेशमा रहेका सबै गैरआवासीय नेपालीलाई नेपालका कुनै पनि बैंकमा डलर खाता खोल्न अनुरोध गर्ने र सो खातामा कम्तीमा एक हजार डलर सम्बन्धित देशको बैंकमार्फत नेपालमा ट्रान्सफर गर्न अनुरोध गर्ने निर्णय गरेको छ ।
विदेशबाट अनलाइनमार्फत डलर खाता खोल्दा आइपर्ने प्राविधिक समस्या, डलर डाइरेक्ट पठाउँदा, नेपालमा डलर एकाउन्ट खोलेर बचत गर्दा र आवश्यक परेको बेलामा उक्त रकम फिर्ता लग्दा देखिने समस्या समाधान गर्न एनआरएनएले सरकारसँग माग गरेको छ । आकस्मिक बैठकले कोषाध्यक्षहरूको नेतृत्वमा सबै सहकोषाध्यक्ष रहनेगरी डलर एकाउन्ट खोल्नका लागि चाहिने कागजी प्रक्रिया र आर्थिक पक्षको अध्ययन गरी सबै गैरआवासीय नेपालीलाई जानकारी गराउने र एकाउन्ट खोल्न सहजीकरण गर्ने निर्णय गरेको एनआरएनएद्वारा मंगलबार जारी विज्ञप्तिमा भनिएको छ ।
-1752335779.jpg)
