काठमाडौं– कतारमा गैरकानुनी रूपमा बसोबास गरिरहेका विदेशी श्रमिकलाई कानुनी अवस्था सच्याउने समय थप गरिएको छ । कतारको बसोबास नियमलाई उल्लंघन गरेर विदेशी नागरिकलाई अब ३० अप्रिलभित्र कानुनी अवस्था सच्याउने गरी समय थप गरिएको हो ।
विभिन्न कारणले कतारको बसोबास नियमलाई उल्लंघन गरेका तर आङ्खनो कानुनी अवस्था सच्याइ कतारमै बस्न चाहने वा स्वदेश फर्किन चाहनेहरूले आउँदो १७ वैशाख अर्थात् ३० अप्रिलसम्मको समयसम्म यो सुविधा लिन पाउने बताइएको छ । कतारमा बसोबासको नियम, काम गर्ने भिसाको नियम, घरेलु श्रमिक र पारिवारिक बसोबासको नियम उल्लंघन गरेकाहरूले यो अवसरको फाइदा लिनसक्ने त्यहाँका स्थानीय सञ्चारमाध्यमले जनाएका छन् ।
रोजगार भिसामा कतार गएर कतारी आइडी प्राप्त नगरेका वा नवीकरण नभएका व्यक्तिहरूले आङ्खनो कतार बसाइँलाई वैधानिक बनाउन चाहेमा कुनै रोजगारदाताबाट ‘जब अफर लेटर’सहित तोकिएको केन्द्रमा गएमा बसाइँलाई वैधानिक बनाउन सक्ने समाचारमा जनाइएको छ । यसरी आङ्खनो कानुनी अवस्था सच्याउँदा लाग्ने दण्ड र जरिवानामासमेत छुट गरिएको बताइएको छ ।
स्वदेश फर्किन चाहनेहरूले भने सर्च एण्ड फलोअप डिपार्टमेण्टमा रहेको काउन्टरमा स्वदेश फर्किने टिकटको बुकिङ लिएर गएमा दण्ड जरिवाना छुट हुने बताइएको छ । यसरी आवेदन दिनेहरूले स्थानीय समयअनुसार दिउँसो १ बजेदेखि साँझ ५ बजेसम्म निवेदन दिनसक्ने जनाइएको छ । सुरुमा सन् २०२१ को डिसेम्बर महिनासम्मका लागि दिएको छुट पछि पुनः थप गरेर २०२२ को मार्चसम्म कायम गरिएको थियो । तर, अहिले पुनः एक महिना थप गरेर अप्रिल महिनासम्म यो छुटसहितको सुविधा रहेको बताइएको छ । यो सुविधाको भरपुर मात्रामा उपयोग गर्नका लागि कतारमा रहेको नेपाली दूतावासले समेत त्यहाँ रहेका नेपालीहरूलाई आग्रह गरेको छ ।
-1752335779.jpg)
