काठमाडौं– नेपालीहरूको आकर्षक गन्तव्य मुलुक दक्षिण कोरियाको भाषा परीक्षाका लागि सात वर्षयताकै सबैभन्दा कम आवेदन परेको छ । विगतका वर्षहरूमा मागभन्दा १०औं गुणा बढी आवेदन पर्ने गरेको भए पनि यो वर्ष घटेको हो । यस वर्षका लागि ४४ हजार ८८९ जनाको आवेदन परेको इपिएस कोरिया शाखाले जानकारी दिएको छ ।
कोरोनाका कारण सन् २०१९ पछि दुई वर्ष रोकिएको भाषा परीक्षामार्फत कोरियाले नेपालबाट नौ हजार ६५४ जना छनोट गरेर रोजगारीका लागि कोरिया लैजाने शाखाका निर्देशक पुष्पराज कटुवालले बताए । विगतका वर्षमा एक जनाको कोटाका लागि १५ जनासम्मको आवेदन पर्ने गरेको भए पनि यो वर्ष केही कम मात्रै आवेदन परेको उनले बताए । यो वर्षका लागि आवेदन परेको तथ्यांक हेर्दा एक जनाको कोटामा चार जनाले प्रतिस्पर्धा गर्नेगरी आवेदन परेको उनको भनाइ छ ।
शाखाको तथ्यांकअनुसार सन् २०१६ मा १० हजार दुई जनाको कोटामा ७२ हजार जनाले आवेदन दिएका थिए । २०१७ मा सात हजार ८०० जनाको कोटामा ७५ हजार ५५३ जनाले आवेदन दिएको तथ्यांक छ । यस्तै, सन् २०१८ मा आठ हजार ५१९ जनाको कोटामा ८२ हजार २८६ जना र २०१९ मा सात हजार १३६ जनाको कोटामा ९२ हजार ३५६ जनाले आवेदन दिएका थिए । कोरोनाका कारण २०२० र २०२१ मा कोरियन भाषा परीक्षा रोकिएको थियो ।
यो वर्षका लागि आवेदन दिनेमध्ये उत्पादन क्षेत्रमा ३३ हजार ९९४ जना र कृषि तथा पशुपालन क्षेत्रमा १० हजार ८९५ जनाको आवेदन परेको निर्देशक कटुवालले बताएका छन् । उनले यस पटकदेखि कृषि तथा पशुपालन र उत्पादन क्षेत्रका लागि छुट्टाछुट्टै समयमा परीक्षा सञ्चालन हुने बताए । परीक्षा तालिका यसअघि नै सार्वजनिक भइसकेको छ । यसपटक एक व्यक्तिले एक क्षेत्रमा मात्रै आवेदन दिन पाउने व्यवस्था गरिएको थियो ।
कृषि तथा पशुपालन क्षेत्रका लागि आउँदो वैशाख २६ देखि जेठ १३ गतेसम्म पहिलो चरणको र जेठ २४ देखि असार १६ गतेसम्म दोस्रो चरणमा भाषा परीक्षा सञ्चालन हुनेछ । यस्तै, उत्पादन क्षेत्रका लागि पहिलो चरणमा असार २० देखि भदौ १० गतेसम्म र दोस्रो चरणमा भदौ १६ देखि असोज २० गतेसम्म भाषा परीक्षा सञ्चालन हुने निर्देशक कटुवालले बताए । कोरोनाका कारण नाम निकालेकाहरू समेत जान नपाएको अवस्थाले यो वर्ष आवेदन घटेको हुनसक्ने उनको भनाइ छ ।
