काठमाडौं– श्रम, रोजगार तथा सामाजिक सुरक्षामन्त्री कृष्णकुमार श्रेष्ठले वैदेशिक रोजगारीमा जाने व्यक्तिको अभिमुखीकरण तालिमलाई कडाइ गरिने बताएका छन् । वैदेशिक रोजगार बोर्डको सचिवालयले आइतबार आयोजना गरेको ‘परिमार्जित पूर्वप्रस्थान अभिमुखीकरण तालिम कार्यान्वयनको अवस्था’ सम्बन्धी अन्तक्र्रिया कार्यक्रममा मन्त्री श्रेष्ठले यस्तो बताएका हुन् ।
उनले अनिवार्यरूपमा लिनुपर्ने अभिमुखीकरण तालिम नलिई तालिमको प्रमाणपत्र मात्र लिने र दिने गरिएको पाइएमा कडा कारबाही गरिने चेतावनीसमेत दिएका छन् । मन्त्री श्रेष्ठले सेवाग्राहीलाई प्रदान गरेको सूचना र जानकारीले वैदेशिक रोजगारी सुरक्षित र उपलब्धिमूलक हुने भएकोले पूर्वप्रस्थान अभिमुखीकरण तालिमलाई प्रभावकारी र समयानुकूल बनाइने बताए । यस्तो किसिमको तालिम प्रदान गर्ने संस्थाहरूलाई मर्ज गरेर श्रमिकलाई स्तरीय तालिम दिने व्यवस्था गर्नसमेत सरकार लागिरहेको उनले बताए ।
मन्त्रालयका सचिव एकनारायण अर्यालले विदेश जानुपूर्वको तालिम अभावले जोखिम बढेको भन्दै यस्तो तालिमलाई प्रभावकारी बनाउनुपर्ने बताए । ‘पूर्वप्रस्थान अभिमुखीकरण तालिमको अभावले वैदेशिक रोजगारीका क्रममा जोखिम बढेको छ, यसलाई औपचारिकतामा मात्र सीमित गर्न हुँदैन,’ सचिव अर्यालले भने । वैदेशिक रोजगारीमा जाने व्यक्तिहरूको वैदेशिक रोजगारको यात्रालाई सुरक्षित, मर्यादित र उपलब्धिमूलक बनाउन विषयगत तालिमलाई पनि प्रभावकारी बनाउनुपर्ने सचिव अर्यालले बताए ।
वैदेशिक रोजगार विभागका महानिर्देशक शेषनारायण पौडेलले वैदेशिक रोजगारीमा जाने व्यक्तिहरूलाई गन्तव्य मुलुकका विषयमा महत्वपूर्ण जानकारी, विद्यमान कानुन, धर्म, संस्कृति, रीतिरिवाजका विषयमा जानकारी गराउनुपर्ने बताएका छन् ।
-1752335779.jpg)
