काठमाडौं– विश्व बैंकका क्षेत्रीय निर्देशक लीन बेन्जले नेपाल सरकारको आन्तरिक रोजगारी प्रवद्र्धनसम्बन्धी नीति कार्यान्वयनमा विश्व बैंकले सहयोग गर्ने बताएका छन् । श्रम, रोजगार तथा सामाजिक सुरक्षामन्त्री कृष्णकुमार श्रेष्ठसँग मंगलबार भएको भेटमा उनले उक्त प्रतिबद्धता जनाएका हुन् ।
सरकार, विकास साझेदार र निजी क्षेत्रसँग सहकार्य गरी विपन्न तथा जोखिमपूर्ण जीवनयापन गरिरहेका नेपाली जनतालाई सहयोग गर्न विश्व बैंक तयार रहेको उनले बताए । मन्त्री श्रेष्ठ र निर्देशक लीनबीच सिंहदरबारस्थित श्रम मन्त्रालयमा मंगलबार भेटवार्ता भएको हो । भेटका क्रममा विश्व बैंकको लगानीमा रहेका परियोजनाको प्रभावकारिताका विषयमा छलफल भएको बताइएको छ । सोही अवसरमा मन्त्री श्रेष्ठले आन्तरिक रोजगारीका लागि सरकारले लिएको रणनीति कार्यान्वयनमा विश्व बैंकको सहयोग महत्वपूर्ण रहेको बताएका थिए । विश्व बैंकले आन्तरिक रोजगार सिर्जना गर्न प्रधानमन्त्री रोजगार कार्यक्रमसँग आबद्ध युवा रोजगारीका लागि रूपान्तरण पहल आयोजनामा गरेको सहयोगको लागि मन्त्री श्रेष्ठले धन्यवाद दिएका थिए ।
नेपालमा बेरोजगार व्यक्तिको वैयक्तिक विवरण, ज्ञान, सीप र अनुभव, रोजगारीको सम्भाव्य क्षेत्र तथा श्रम बजारका माग र आपूर्ति पक्षसमेतको विवरण एकीकृत गरी रोजगार व्यवस्थापन सूचना प्रणालीको स्तरोन्नतिका लागि विश्व बैंकले सहयोग गरिरहेको छ । मन्त्री श्रेष्ठ प्रधानमन्त्री रोजगार कार्यक्रमलाई प्रभावकारी बनाउन दिगो रोजगारीसँग जोड्ने, बेरोजगार, विपन्न तथा लक्षित वर्गका लागि उपयोगी किसिमका पूर्वाधार विकास गर्ने तथा बजारको मागअनुसार रोजगारी आपूर्ति गर्नेतर्फ थप सहकार्य जरूरी रहेको बताए ।
माल्दिभ्स, नेपाल तथा श्रीलंकाका लागि विश्व बैंकका राष्ट्रिय निर्देशक फारिस हदाद जर्भोसले नेपालमा थप रोजगारमुलक कार्यक्रम, यससम्बन्धी नीति, क्षमता विकास तथा सेवा प्रवाहमा सुधार हुनेगरी सहायता परिचालन गर्न विश्व बैंक तयार रहेको बताए । भेटका क्रममा प्रधानमन्त्री रोजगार कार्यक्रमका राष्ट्रिय कार्यक्रम निर्देशक तथा मन्त्रालय प्रवक्ता डण्डुराज घिमिरेले परियोजनामार्फत भइरहेका कार्यक्रमहरूबारे जानकारी गराएका थिए ।
