काठमाडौं– नेपालीहरूको आकर्षक श्रम गन्तव्य मुलुक दक्षिण कोरियाको भाषा परीक्षाका लागि ४२ हजारभन्दा बढीले आवेदन दिएका छन् । सोमबार साँझसम्म ४२ हजार ८११ जनाको आवेदन प्राप्त भएको इपिएस कोरिया शाखाका निर्देशक पुष्पराज कटुवालले जानकारी दिए ।
यद्यपि, आवेदन सोमबार राति १२ बजेसम्म लिइने भएकाले अन्तिम संख्या मंगलबारमात्रै यकीन हुने निर्देशक कटुवालले बताए । दक्षिण कोरियाको रोजगारीमा जान इच्छुकहरूका लागि भाषा परीक्षामा सामेल हुन १४ चैतदेखि आवेदन खुला गरिएको थियो ।
प्राप्त आवेदनमा उत्पादनतर्फ ३२ हजार ५२० जना र कृषि तथा पशुपालन क्षेत्रमा १० हजार २९१ जना रहेको उनले बताए । अहिले दैनिक दुई हजारका दरले फाराम फर्ने क्रम भएकाले करिब ५० हजारको आवेदन पर्ने अनुमान गरिएको उनले बताए ।
कृषि तथा पशुपालन र उत्पादन क्षेत्रका लागि छुट्टाछुट्टै परीक्षा हुने गरी तालिका सार्वजनिक समेत भएको छ । कृषि तथा पशुपालन क्षेत्रको लागि आउँदो २६ वैशाखदेखि १३ जेठसम्म पहिलो चरणको र २४ जेठदेखि १६ असारसम्म दोस्रो चरणको भाषा परीक्षा सञ्चालन हुनेछ ।
यस्तै, उत्पादन क्षेत्रको लागि पहिलो चरणमा २० असारदेखि १० भदौसम्म र दोस्रो चरणमा १६ भदौदेखि २० असोजसम्म भाषा परीक्षा हुने निर्देशक कटुवालले बताए । सन् २०२२/२३ को लागि दक्षिण कोरियाले उत्पादनतर्फ छ हजार २१३ र कृषि तथा पशुपालनतर्फ दुई हजार ७४१ गरी नौ हजार ६५४ जना श्रमिक लैजाने भएको छ ।
-1752335779.jpg)
