काठमाडौं– दक्षिण कोरियाले नेपालबाट मौसमी कामदार (श्रमिक) लैजाने प्रक्रिया अगाडि बढाएको छ । दुई देशका स्थानीय तहहरूको समन्वयमा मौसमी कामदार लैजाने तयारी गरिएको छ । रोजगारीका लागि आकर्षक गन्तव्य कोरियामा यसअघि इपिएस भाषा परीक्षा उत्तीर्ण गरेका श्रमिक मात्रै लगिँदै आएको थियो । तर, कामदार अभाव बढेपछि कोरियाले मौसमी कामदार लैजाने भएको हो ।
श्रम, रोजगार तथा सामाजिक सुरक्षा मन्त्रालयका प्रवक्ता डण्डुराज घिमिरेका अनुसार कोरियाले नेपालबाट चार हजार मौसमी श्रमिक लैजाने भएको छ । त्यहाँको कानुन तथा न्याय मन्त्रालयले तग जनावरीमै यसको लागि स्वीकृति दिइसकेको छ । मौसमी श्रमिक सीधै स्थानीय तहबाट लैजाने कोरियाको तयारी छ ।
कोरियाको न्याय मन्त्रालयले मौसमी श्रमिक लैजानेबारे नेपालसहित चार देशका प्रतिनिधिसँग छलफल गरी कानुन नै परिवर्तन गरेको जानकारी नेपालको श्रम मन्त्रालयलाई गराइसकेको छ । मौसमी श्रमिक पहिलो चरणमा कृषि र माछापालन तथा दोस्रो चरणमा निर्माण क्षेत्रमा लगिने श्रम, रोजगार तथा सामाजिक सुरक्षा मन्त्रालयका प्रवक्ता घिमिरेले बताए ।
नेपाल कल्चर सेन्टर कोरियाको पहलमा नेपाललाई मौसमी श्रमिक लैजानेबारे कोरियाका ३० भन्दा बढी स्थानीय निकायबाट अनुरोध आएकोे जानकारी दिइएको छ । कल्चर सेन्टरका प्रतिनिधिले नेपालबाट मौसमी श्रमिक लैजानेबारे श्रम, रोजगार तथा सामाजिक सुरक्षामन्त्री कृष्णकुमार श्रेष्ठलगायत सम्बन्धित अधिकारीसँग समेत यसअघि नै छलफल गरिसकेको जनाइएको छ । कोरियामा मौसमी कामदार पठाउने विषयमा श्रम मन्त्रालयले समेत प्रक्रिया अगाडि बढाएको छ । दुवै देशका स्थानीय तहबीच समझदारी भएपछि मात्र श्रमिक लैजाने/पठाउने निश्चित हुने बताइएको छ । कोरियाले मौसमी श्रमिक लैजान कहिलेबाट सुरु हुन्छ भन्ने अझै निश्चित भइसकेको छैन । मौसमी श्रमिकको रूपमा कोरिया जाने व्यक्तिले न्यूनतम साढे दुई लाखभन्दा माथि पारिश्रमिक पाउने बताइएको छ । उनीहरूको करार अवधि छ र नौ महिनाको हुनेछ । मौसमी श्रमिकले करारअवधिको रोजगार बिमा, स्वास्थ्यलगायत सुविधा इपिएसमार्फत जाने श्रमिकले जस्तै पाउने गरी कोरियाको सम्बन्धित निकायसँग छलफल भएको श्रम मन्त्रालयले जनाएको छ ।
मन्त्रालयका अनुसार कोरिया जाने मौसमी श्रमिकले आधारभूत कोरियाली भाषाको ज्ञान भने हासिल गरेको हुनुपर्छ । मौसमी रूपमा कोरियामा रोजगारी गर्न जाने श्रमिकको खर्च रोजगारदाताले नै बेहोर्नुपर्ने प्रस्ताव गरिएको मन्त्रालयले जनाएको छ । कोरियाले सन् २०२२ मा नेपालसहित थाइल्यान्ड, कम्बोडिया, भियतनामबाट मौसमी श्रमिक लैजाने बताइएको छ ।
