काठमाडौं– नेपालीहरूको प्रमुख श्रम गन्तव्य मुलुक मलेसियामा सरकारले घोषणा गरेको पारिश्रमिक वृद्धिको निर्णयप्रति त्यहाँको औद्योगिक क्षेत्रका व्यवसायीहरूले असन्तुष्टि जनाएका छन् । मलेसियाका प्रधानमन्त्री इमाल साब्री याकोभले आज (१ अप्रिल)देखि लागू हुनेगरी घोषणा गरेको पारिश्रमिक वृद्धिमा व्यवसायीले असन्तुष्टि जनाएका हुन् ।
प्रधानमन्त्री याकोभले श्रमिकको न्यूनतम पारिश्रमिक वृद्धि गरेर मासिक एक हजार ५०० रिंगेट बनाउने घोषणा गरेका थिए । तर, प्रधानमन्त्रीको यो घोषणालाई लिएर मलेसियाका कतिपय क्षेत्र भने असन्तुष्ट बनेको त्यहाँका स्थानीय सञ्चारमाध्यमले जनाएका छन् । समाचारमा जनाइएअनुसार मलेसियाको औद्योगिक क्षेत्रले सरकारको निर्णयविरुद्ध विरोध प्रदर्शनसमेत गरेको छ । बढाएको पारिश्रमिक लागू गर्दा कम्पनी घाटामा जाने र खर्च व्यहोर्न नसक्ने औद्योगिक क्षेत्रका व्यवसायीहरूले बताएको समाचारमा उल्लेख छ ।
प्रधानमन्त्री याकोभले भने सुरूमा ठूला कम्पनी तथा सरकारी निकायसँग आबद्ध कम्पनीहरूमा न्यूनतम ज्याला वृद्धि लागू हुने बताएका छन् । साना, थोरै श्रमिक काम गर्ने तथा न्यून आम्दानी भएका कम्पनीहरूमा भने मानव संसाधनमन्त्रीले अन्य मन्त्रीहरूसँग छलफल गरेर त्यस्ता कम्पनीहरूमा कहिलेदेखि न्यूनतम ज्याला वृद्धि लागू गर्ने भन्ने तय हुने बताएका छन् ।
मलेसियाले १ फेब्रुअरी २०२० देखि न्यूनतम पारिश्रमिक एक हजार २०० लागू गरेको थियो । आजदेखि लागू हुने गरी वृद्धि हुन लागेको पारिश्रमिकबाट नेपालीसहित विभिन्न देशबाट मलेसियामा काम गर्न जाने आप्रवासी श्रमिक लाभान्वित हुने छन् ।
-1745656903.jpeg)