काठमाडौं– सत्तारुढ दल नेपाली कांग्रेसनिकट नेपाल लोकतान्त्रिक वैदेशिक रोजगार व्यवसायी एसोसियसनको साधारणसभा आगामी ७ वैशाखमा हुने भएको छ । मंगलबार बसेको एसोसियसनको कार्यसमिति बैठकले ७ वैशाखमा निर्वाचनसहितको साधारणसभा गर्नेे मिति तय गरेको हो ।
निर्वाचनका लागि तीन सदस्यीय निर्वाचन समिति गठन गरिएको एसोसियसनका अध्यक्ष नरेन्द्रप्रसाद ढकालले जानकारी दिएका छन् । उनका अनुसार निर्वाचन समिति संयोजकको जिम्मेवारी संस्थापक अध्यक्ष तिलकबहादुर रानाभाटलाई दिइएको छ । कमलदेव मल्ल र अधिवक्ता दुर्गादत्त पाण्डेलाई सदस्यको जिम्मेवारी तोकिएको उनले बताए ।
विधानअनुसार एसोसियसनको आगामी साधारणसभाले अध्यक्ष, वरिष्ठ उपाध्यक्ष, उपाध्यक्ष, महासचिव, सचिव, कोषाध्यक्ष र सहकोषाध्यक्षसहित १७ जना सदस्य निर्वाचित गर्नेछ । बाँकी चार जना सदस्य भने अध्यक्षले मनोनीत गर्ने व्यव्सथा विधानमा गरिएको छ । अध्यक्ष ढकालले आगामी साधारणसभाबाट सर्वसम्मत नेतृत्व चयन गर्ने विषयमा छलफल भइरहेको बताए । त्यसमा सहमति जुट्न नसके लोकतान्त्रिक प्रक्रियाबाट नेतृत्व चयन गरिने उनको भनाइ छ । सहमति भए आफू पुनः अध्यक्षमा दोहोरिने संकेतसमेत ढकालले गरेका छन् । ‘अर्को कार्यकालका लागि अध्यक्षमा दोहारिने/नदोहोरिने विषयमा छलफल चलिरहेको छ, यसै भन्न सक्ने अवस्था छैन,’ उनले भने ।
अध्यक्षमा तीन जना आकांक्षी
एसोसियसनको आगामी नेतृत्वका लागि तीन जना आकांक्षी देखिएका छन् । अध्यक्ष ढकालसँगै वर्तमान कार्यसमितिमा प्रथम उपाध्यक्ष रहेका तारानाथ अर्याल र पूर्वउपाध्यक्ष ऋषि शर्मा अध्यक्षका दाबेदार देखिएका हुन् । यद्यपि, वर्तमान अध्यक्ष ढकालले आफू सर्वसम्मत भएमात्रै दोहोरिने बताएका छन् । प्रथम उपाध्यक्ष अर्यालले अध्यक्षमा आफ्नो दाबी स्वाभाविक भएको बताए ।
वरिष्ठ उपाध्यक्षमा हालका महासचिव भवानी निरौला, किशोरकुमार केसी, थिरमणि पौडेल र जनक खड्का आकांक्षी देखिएका छन् । त्यसैगरी द्वितीय उपाध्यक्षमा नारायण पराजुली, मेघनाथ भुर्तेल र मित्रदेव घिमिरे, तृतीय उपाध्यक्षमा बाबुलाल मगर (नरेन्द्र) र केशवराज न्यौपाने, महासचिवमा कमल काफ्ले र विनोदजंग केसी, सचिवमा कृष्णप्रसाद जैसी, कर्णराज कटुवाल, भोजराज भुषाल, प्रकाश बोहरा, विक्रम श्रेष्ठ र जंगबहादुर इजम, सहसचिवमा नवीन पोखरेल, तुलसी पुरी, अमीर बास्तोला र सुरेश ढकालले दाबी रहेको बताइएको छ । कोषाध्यक्षमा राजेश गौतम तथा इन्द्र आचार्य, सहकोषाध्यक्षमा निलम केसीले उम्मेदवारी दिने चर्चा रहेको एसोसियसनमा आबद्ध व्यवसायीहरू बताउँछन् ।
-1745656903.jpeg)