काठमाडौं– वैदेशिक रोजगारीमा गएर मृत्यु भएका व्यक्तिको परिवार तथा अंगभंग वा गम्भीर बिरामी भएका व्यक्तिले आर्थिक सहायताका लागि स्थानीय तहबाटै निवेदन दिनसक्ने भएको छ । वैदेशिक रोजगार बोर्डको सचिवालयले सूचना जारी गरी उक्त जानकारी दिएको हो ।
वैदेशिक रोजगार नियमावली, २०६८ अनुसार श्रम स्वीकृति लिएर रोजगारीमा गएका व्यक्तिहरूको अंगभंग भए वा मृत्यु भएमा आर्थिक सहायताका लागि स्थानीय तहमा नै निवेदन दिनसक्ने व्यवस्था गरिएको सूचनामा उल्लेख छ ।
वैदेशिक रोजगार नियमावली, २०६८ (पाँचौं संशोधन) मा व्यवस्था भएअनुसार श्रम स्वीकृति लिइ वैदेशिक रोजगारीमा गएका कामदारको करार अवधिमा वा करार अवधि समाप्त भएको एक वर्षभित्र कुनै कारणले मृत्यु, अंगभंग वा गम्भीर बिरामी भएमा घटना घटेको मितिले एक वर्षभित्र बोर्डबाट नियमानुसारको आर्थिक सहायता वा क्षतिपूर्तिका लागि स्थानीय तहमार्फत निवेदन दिन सकिने जानकारी दिइएको छ ।
नियमावलीमा रहेको व्यवस्था अनुसार सेवालाई थप सरल र सहज बनाउनका लागि यस्तो व्यवस्था गरेको बोर्डले जनाएको छ । यो व्यवस्था कार्यान्वयनका लागि सचिवालयको अनलाइन सङ्खटवेयर प्रणाली विकास गरिने सूचनामा उल्लेख छ ।
यो प्रणाली विकासका लागि नेपाल सरकार, श्रम रोजगार तथा सामाजिक सुरक्षा मन्त्रालयको मन्त्रीस्तरीय निर्णयअनुसार वैदेशिक रोजगार कल्याणकारी सूचना व्यवस्थापन प्रणाली (सञ्चालन तथा व्यवस्थापन) कार्यविधि, २०७८ समेत स्वीकृत भएर कार्यान्वयनमा आएको जनाइएको छ ।
कार्यविधिअनुसारको अनलाइन प्रणाली प्रयोग गर्ने प्रयोगकर्ताको प्रमाण, प्रयोगकर्ताको नाम र पासपोर्ड प्रयोग गरी बोर्ड सचिवालयबाट प्रवाह हुने सेवाका लागि स्थानीय सेवाग्राहीहरूलाई सहजीकरण गर्न इच्छुक सबै स्थानीय तहले यही चैत मसान्तभित्र आधिकारिक व्यक्तिको सम्पर्क नम्बर, इमेल ठेगाना र दस्तखत नमूना उल्लेख गरी सचिवालयमा पत्राचार गर्नसमेत आग्रह गरिएको छ । अनलाइन प्रणाली एवं कार्यविधिलगायत अन्य विषयमा कुनै पनि जाकारी आवश्यक परेको खण्डमा बोर्डको सचिवालयमा सम्पर्क गर्न अनुरोध गरिएको छ ।
-1745656903.jpeg)