काठमाडौं– गैरआवासीय नेपाली संघ (एनआरएनए)को अध्यक्षमा विनोद कुँवर चयन भएका छन् । काठमाडौंको याक एण्ड यती होटलमा पूर्वअध्यक्ष शेष घलेपक्षले आयोजना गरेको १०औँ विश्व सम्मेलनले कु“वरलाई अध्यक्ष चयन गरेको हो ।
एनआरएनएभित्र जारी विवादबीच घलेपक्षले ८ चैतदेखि छुट्टै विश्व सम्मेलन गरेको थियो । कुमार पन्त नेतृत्वको कार्यसमितिले समयमा निर्वाचन गर्न नसकेपछि पूर्वअध्यक्ष घलेले विधानको अधिकार प्रयोग गरी विश्व सम्मेलन गराएका हुन् । घलेले कार्यसमिति विघटन भएको घोषणा गर्दै उपाध्यक्ष सोनु लामाको संयोजकत्वमा महाधिवेशन आयोजक समिति गठन गरेका थिए ।
सोही समितिले आयोजना गरेको विश्व सम्मेलनबाट कु“वरको नेतृत्वमा नया“ कार्यसमिति चयन गरिएको हो । तर, संस्थापनपक्षले भने यसलाई मान्यता नदिने बताएको छ । पन्त पक्षले यसअघि असन्तुष्ट बनेका कुल आचार्यसहितलाई समेटेर यही २६–२७ मार्च (१२–१३ चैत)मा विश्व सम्मेलन आयोजना गर्ने मिति घोषणा गरेको छ ।
घले समूहबाट अध्यक्षमा चयन भएका कुँवर दक्षिण कोरियामा व्यवसायमा संलग्न छन् ।
सन् २००६ देखि एनआरएनएमा लागेका उनी संस्थापक सदस्य हु“दै सन् २००९–११ मा कोरियाको अध्यक्ष भए । त्यसपछि एनआरएनए कोरियाको सल्लाहकारको रूपमा रहेका उनी सन् २०१३–१५ सम्मको कार्यकालमा फेरि अध्यक्ष चयन भएका थिए । २०१५–१७ मा आइसिसी सदस्य बनेका उनी २०१७–१९ को कार्यकालमा एसिया प्यासिफिक क्षेत्रको उपसंयोजक भएर काम गरेका थिए । पछिल्लो कार्यकाल २०१९–२१ मा भने उनी सोही पदमा पराजित भएका थिए ।
अध्यक्षमा चयन भएपछि उनले एनआरएनए विशुद्ध गैरराजनीतिक र सामाजिक संस्था भएकाले आफूले सोहीअनुसार भूमिका खेल्ने बताए । उनले एनआरएनहरूबीच अझै एकताको विकल्प नभएको बताउँदै त्यसका लागि आफूले पहल गर्ने प्रतिबद्धता जनाए ।
नवाैँ सम्मेलनले डेलिगेट चयनलगायतका विषयमा सुझबुझपूर्ण निर्णय गर्न नसक्दा अहिलेको अवस्था निम्तिएको उनको भनाइ छ । यो समूहको विश्व सम्मेलनबाट उपाध्यक्षमा थर्कबहादुर सेन, सुरेन्द्र सिग्देल, उमेशकुमार पुडासैनी, बाबुराम लामा चयन भएका छन् । महिला उपाध्यक्षमा भूमा लिम्बू चयन भएकी छन् ।
यस्तै महासचिवमा जानकी गुरुङ र सचिवमा जुनु गुरुङ निर्वाचित भएका छन् । कोषाध्यक्षमा डिलाराम खरेल, अमेरिका संयोजकमा कृष्ण पोखरेल, ओसियानामा केशव कँडेल र युरोप क्षेत्रीय उपसंयोजकमा उल्काप्रसाद घिमिरे चयन भएको निर्वाचन समितिले जानकारी दिएको छ ।
