काठमाडौं– नेपालबाट वैदेशिक रोजगारीमा जाने नेपालीको संख्या लगातार दोस्रो महिनामा पनि कमी आएको छ । चालू आर्थिक वर्षको सुरुवातदेखि नै लगातार घट्दै गएको विदेश जाने श्रमिकको संख्या माघ महिनाजस्तै फागुन महिनामा पनि कमी आएको हो ।
फागुन महिनामा नेपालबाट ५३ हजार ४५७ जनाले श्रम स्वीकृति लिएर विदेश गएको वैदेशिक रोजगार विभागको तथ्यांकले देखाएको छ । यो संख्या अघिल्लो महिनाको तुलनामा एक हजार १३ जनाले कम हो । नेपालबाट माघ महिनामा भने ५४ हजार ४७० जनाले श्रम स्वीकृति लिएर विदेश गएको विभागको तथ्यांकले देखाएको छ । फागुन महिनामा नेपालबाट विभिन्न ८२ देशमा रोजगारीका लागि नेपाली श्रमिक गएको विभागको तथ्यांकले देखाएको छ ।
फागुन महिनामा रोजगारीका लागि सबैभन्दा धेरै साउदी अरब गएको तथ्यांकमा उल्लेख छ । विभागले जारी गरेको मासिक प्रगति प्रतिवेदनअनुसार श्रम स्वीकृति लिएर विदेश जाने नेपालीमा साउदीपछि कतार रहेको छ । फागुन महिनामा नेपालबाट १५ हजार ६३ जना नेपाली श्रम स्वीकृति लिएर रोजगारीका लागि कतार गएको विभागले जनाएको छ ।
त्यस्तै रोजगारीको अर्को प्रमुख गन्तव्य मुलुक युएईमा रोजगारीका लागि जाने नेपालीको संख्या ११ हजार ४९८ जना रहेको विभागको तथ्यांकले देखाएको छ । त्यस्तै कुवेत जनेको संख्या चार हजार ७५१ जना र बहराइन जाने नेपालीको संख्या एक हजार २६४ रहेको विभागले सार्वजनिक गरेको तथ्यांकले देखाएको छ ।
यता, प्रमुख श्रम गन्तव्यका रूपमा रहे पनि केही समयअघि मात्रै खुला भएको मलेसिया जाने नेपालीको संख्या ९९१ जना रहेका छन् । यता ओमान जाने नेपालीको संख्या ७५८ जना रहेको विभागले जनाएको छ । त्यस्तै, रोजगारीका लागि युरोपमा भने सबैभन्दा बढी श्रमिक क्रोएसिया गएका छन् । फागुन महिनामा नेपालबाट क्रोएसिया जाने नेपालीको संख्या ६२२ जना रहेको विभागले जनाएको छ ।
पछिल्लो समय क्रोएसिया र रोमानिया जाने नेपालीको संख्या बढ्दै गएको देखिएको छ । फागुन महिनामा रोमानिय जाने नेपालीको संख्या ४३६ जना रहेको छ । चालू आर्थिक वर्षको सुरुदेखि बढेको संख्या पछिल्लो महिनादेखि लगातार घट्दा देशको आर्थिक क्षेत्रमा समेत नकारात्मक प्रभाव देखिने सम्भावना बढेको सरोकारवालाहरूले बताएका छन् ।
सबैभन्दा धेरै धनुषा र कम मनाङबाट
फागुन महिनामा नेपालबाट रोजगारीमा जानेमध्ये सबैभन्दा बढी धनुषा जिल्लाका रहेका छन् भने सबैभन्दा कम मनाङ जिल्लाका रहेका छन् । एक महिनाको अवधिमा धनुषाबाट तीन हजार २५३ जना रहेको छन् भने मनाङबाट एक महिनामा चार जनाले रोजगारीका लागि विदेश जान श्रम स्वीकृति लिएको विभागले जारी गरेको प्रगति विवरणमा देखाएको छ ।
फागुन महिनामा धेरै श्रमिक विदेश जानेमा सिराहा दोस्रो स्थानमा रहेको छ । एक महिनाको अवधिमा सिराहाबाट दुई हजार ६२३ जना रोजगारीका लागि विदेशिएको विभागले जनाएको छ । त्यस्तै झापाबाट पनि एक महिनामा दुई हजारभन्दा बढी विदेश गएको देखिएको छ । त्यहा“बाट फागुन महिनामा दुई हजार ४७२ जनाले श्रम स्वीकृति लिएर विदेश गएका छन् ।
त्यस्तै महोत्तरीबाट दुई हजार ३१६ जना रोजगारीका लागि विदेश गएको विभागले जनाएको छ । यता मोरङबाट दुई हजार १२६ जना विदेश गएका छन् । एक महिनाको अवधिमा नवलपरासीबाट एक हजार ८६८, रूपन्देहीबाट एक हजार ६४१, सुनसरीबाट एक हजार ६३५, सर्लाहीबाट एक हजार ५८१ जना रोजगारीका लागि विदेश गएका छन् ।
त्यस्तै तनहु“बाट एक हजार ४२१, स्याङ्जाबाट एक हजार ३९४, सप्तरीबाट एक हजार ३७७, चितवनबाट एक हजार २५९, रौतहडबाट एक हजार ३२ र दाङबाट एक हजार १३ जना रोजगारीका लागि विदेश गएको तथ्यांकले देखाएको छ ।
