काठमाडौं– नेपाल र सेसेल्सबीच श्रम सम्झौता गर्ने सहमति भएको छ । नेपालका श्रम रोजगार तथा सामाजिक सुरक्षामन्त्री कृष्णकुमार श्रेष्ठको सेसेल्स भ्रमणका क्रममा दुई देशबीच श्रम सम्झौता गर्ने सहमति भएको हो ।
मन्त्री श्रेष्ठ र सेसेल्सका रोजगार तथा सामाजिक मामिलामन्त्री प्याट्रिका ङ्खयानकोट र आन्तरिक मामिलामन्त्री इरोल फोन्स्कोसँग द्धिपक्षीय भेटवार्ताका क्रममा सहमति भएको जनाइएको छ । सो भेटवार्ताका क्रममा नेपाल र सेसेल्सबीचको द्विपक्षीय हित र आपसी सम्बन्धबारे छलफल भएको पनि बताइएको छ ।
दुई देशका मन्त्रीबीचको भेटका क्रममा एक महिनाभित्र द्विपक्षीय श्रम सम्झौता गर्ने टुंगोमा पुर्याउने सहमति भएको जनाइएको छ । श्रम सम्झौता टुंगो लगाउनका लागि संयुक्त कार्यदल गठन गर्ने सहमति भएको भएको हो ।
वैदेशिक रोजगारीका लागि नेपाली कामदार लैजान गणतन्त्र सेसेल्सबाट यसअघि प्राप्त भएको द्विपक्षीय श्रम सम्झौताको प्रस्तावका लागि मन्त्री श्रेष्ठले धन्यवादसहित सेसेल्ससँग द्विपक्षीय श्रम सम्झौता गर्न नेपाल तयार रहेको बताइएको छ ।
सो अवसरमा न्यूनतम योग्यता, भाषागत दक्षता, न्यूनतम पारिश्रमिकलगायत सेवा सुविधा, कामदार छनोट र स्वदेश फिर्तीलगायत विषयमा संयुक्त कार्यदलले तयारी गर्ने जनाइएको छ । कार्यदलमा नेपालको तर्फबाट मन्त्रालयका उपसचिव डा. थानेश्वर भुषालले नेतृत्व गर्ने बताइएको छ ।
अहिले एक हजार २५० भन्दा धेरै नेपाली सेसेल्समा रोजगारीको क्रममा रहेको जनाइएको छ । सेसेल्स रहेका धेरै नेपाली अहिले सुरक्षागार्डका रूपमा कार्यरत छन् । यसबाहेक होटल तथा पर्यटन क्षेत्रमा पनि केही श्रमिक कार्यरत रहेको सरकारी तथ्यांकले देखाएको छ । नेपाल र सेसेल्सबीच तीन दशकदेखि कूटनीतिक सम्बन्ध स्थापना भएको हो ।
