काठमाडौं– प्रधानमन्त्री शेरबहादुर देउवाले साउदी अरबमा कार्यरत नेपाली श्रमिकको सुरक्षाका लागि शीघ्र श्रम सम्झौता गर्नुपर्नेमा जोड दिएका छन् । नेपालको औपचारिक भ्रमणमा रहेका साउदी अरब अधिराज्यका विदेशमन्त्री राजकुमार फैसल बिन फहरान अल साउदसँगको शिष्टाचार भेटका क्रममा मंगलबार प्रधानमन्त्री देउवाले उक्त कुरा राखेका हुन् ।
नेपाली कामदारको हकहितको रक्षालगायत विदेशी कामदारलाई उपयुक्त र द्रुत कानुनी संरक्षणको अभावमा साउदीमा नेपालीले झेल्नुपरेका समस्याको उचित व्यवस्थापनका निम्ति शीघ्र श्रम सम्झौता गर्नुपर्ने उनको जोड थियो । प्रधानमन्त्री देउवाको आग्रहलाई सकारात्मकरूपमा लिँदै साउदी राजकुमारले नेपालीको कामप्रतिको समर्पण, निष्ठा, इमान्दारीको मुक्तकण्ठले प्रशंसा गरेका थिए । उनले साउदी र नेपालीबीचको जनस्तरको सम्बन्धलाई नेपाली श्रमिकले सुदृढ एवं सुमधुर तुल्याएको बताए ।
प्रधानमन्त्रीनिवास बालुवाटारमा भएको भेटमा नेपाल र साउदी अरबबीचको सम्बन्धका विविध पक्ष, पारस्परिक हित एवं चासोका विस्तृत विषयका साथै बहुपक्षीय मञ्चमा सहयोग आदानप्रदान गर्नेबारेमा विचारविमर्श भएको बताइएको छ । द्विपक्षीय सम्बन्धलाई थप सुदृढ तुल्याउने नेपाल सरकारको चाहना अभिव्यक्त गर्दै प्रधानमन्त्री देउवाले नेपालमा उपलब्ध लगानीका अवसरको उपयोग गर्न आग्रह गरेका थिए । उनले व्यापार, वाणिज्य र पर्यटन प्रवद्र्धनमा जोड दिएका थिए ।
मंगलबार नै दुवै देशका परराष्ट्रमन्त्रीबीच प्रतिनिधिमण्डलस्तरीय वार्ता भएको थियो । दुई परराष्ट्रमन्त्रीले सहयोगात्मक द्विपक्षीय सम्बन्धका विविध क्षेत्रका बारेमा छलफल गर्दै वैदेशिक रोजगारी, नेपाली आप्रवासी कामदारको हितलगायत पारस्परिक लाभका क्षेत्रमा सहयोगका सम्भावनाहरू खोजिनुपर्नेमा जोड दिएका थिए ।
एक दशकअघि साउदी अरबमा नेपाली कामदारले रोजगारीका अवसर पाएपछि दुई देशका जनताबीचको सम्बन्ध विस्तारै बढ्दै गएको छ । चार लाखभन्दा बढी नेपालीले साउदी अरबमा श्रम गरिरहेको वर्तमान सन्दर्भमा भएको विदेशमन्त्रीको भ्रमणले नेपाली आप्रवासी कामदारका सेवासुविधा र अवसरमा बढोत्तरी हुने अपेक्षा गरिएको छ ।श्रीलंकाबाट निजी विमानमा सोमबार साँझ काठमाडौं आएका साउदी राजकुमार मंगलबार बंगलादेशको ढाकातर्फ प्रस्थान गरेका छन् ।
