काठमाडौं– यही १४ चैतदेखि कोरियाली भाषा परीक्षाका लागि आवेदन खुला हुने भएको छ । सोमबार इपिएस कोरिया शाखाले सूचना जारी गरी भाषा परीक्षाका लागि आवेदन माग गरेको हो ।
इपिएसमार्फत रोजगारीका लागि दक्षिण कोरिया जान चाहनेले यही चैत १४ देखि २१ गतेसम्म परीक्षाको आवेदन दिनुपर्ने जानकारी दिइएको छ । कृषि तथा पशुपालन र उत्पादन क्षेत्रका लागि छुट्टा–छुट्टै परीक्षा हुने गरी तालिका सार्वजनिक गरिएको छ । कृषि तथा पशुपालन क्षेत्रको लागि आउँदो २६ वैशाखदेखि १३ जेठसम्म पहिलो चरणको र २४ जेठदेखि १६ असारसम्म दोस्रो चरणको भाषा परीक्षा सञ्चालन हुने बताइएको छ ।
यस्तै उत्पादन क्षेत्रका लागि पहिलो चरणमा २० असारदेखि १० भदौसम्म र दोस्रो चरणमा १६ भदौदेखि २० असोजसम्म भाषा परीक्षा सञ्चालन हुने इपिएस शाखाले जारी गरेको सूचनामा उल्लेख छ । यस्तै सीप परीक्षणका लागि कृषि तथा पशुपालन क्षेत्रतर्फका पहिलो चरणमा २६ वैशाखदेखि १३ जेठसम्म र दोस्रो चरणमा २४ जेठदेखि १६ असारसम्मको मिति तोकिएको छ । उत्पादन क्षेत्रको सीप परीक्षण पहिलो चरणमा २० असारदेखि १० भदौसम्म र दोस्रो चरणमा १६ भदौदेखि २० असोजसम्म हुने सूचनामा उल्लेख छ ।
उक्त अवधिमा १८ वर्ष पूरा भइ ३९ वर्ष ननाघेका नेपाली नागरिकले आवेदन दिनसक्ने इपिएस कोरिया शाखाले जनाएको छ । सन् २०२२/२३ मा दक्षिण कोरियाले उत्पादनतर्फ छ हजार २१३ र कृषि तथा पशुपालनतर्फ दुई हजार ७४१ गरी नौ हजार ६५४ जना श्रमिक लैजाने भएको छ । एक व्यक्तिले एउटा क्षेत्रमा मात्रै आवेदन दिन पाउनेसमेत जनाइएको छ ।
-1745656903.jpeg)