काठमाडौं– नेपालीहरूको प्रमुख श्रम गन्तव्य मुलुक मलेसिया जानका लागि पुनः श्रम स्वीकृति दिइने भएको छ । श्रम स्वीकृति खुला भएसँगै करिब दुई वर्षदेखि रोकिएको मलेसियामा रोजगारीका लागि जाने श्रमिकलाई पुनः श्रम स्वीकृति दिइने भएको हो ।
श्रम रोजगार तथा समाजिक सुरक्षा मन्त्रालयले मलेसिया जाने श्रमिकलाई श्रम स्वीकृति दिने निर्णय गरेको हो । श्रम, रोजगार तथा सामाजिक सुरक्षामन्त्री कृष्णकुमार श्रेष्ठले मलेसिया जाने श्रमिकलाई श्रम स्वीकृति प्रदान गर्ने कार्य पुनः सुरू गर्ने निर्णय गरेको जानकारी दिइएको छ । मलेसियाका लागि श्रम स्वीकृति करिब दुई वर्षदेखि रोकिएकोमा प्रचलित कानुनअनुसार पुनः सुरू गर्ने मन्त्रीस्तरीय निर्णय भएको हो ।
मलेसिया सरकारबाट नेपालीलाई प्राप्त रोजगारीको अवसर गुम्न नदिन प्रचलित वैदेशिक रोजगार ऐन, २०६४ तथा नेपाल–मलेसिया श्रम सम्झौता प्रतिकूल नहुने गरी नेपाली कूटनीतिक नियोगबाट प्रमाणीकरण भइ आएका मागपत्रलाई श्रम स्वीकृति दिने निर्णय भएको मन्त्रालयले जानकारी दिएको छ । कोरोना महामारीका कारण सन् २०२० मार्चदेखि मलेसिया सरकारले विदेशी श्रमिक नलिने निर्णय गरेको थियो । जसकारण लामो समयदेखि वैदेशिक रोजगारीको प्रमुख श्रम गन्तव्य मुलुक मलेसिया श्रमिक पठाउन नपाउँदा वैदेशिक रोजगार व्यवसायी तथा श्रमिक मारमा परेका थिए ।
यद्यपि, गएको २८ जनवरीदेखि मलेसियाले विभिन्न मापदण्डसहित विदेशी श्रमिकको भर्ना प्रक्रिया सुरू गरेको थियो । दूतावासले मागपत्र प्रमाणीकरण गरेर पठाए पनि नेपाल सरकारले श्रम स्वीकृति दिने कार्य सुरू गरेको थिएन । अहिलेको मन्त्रीस्तरीय निर्णयअनुसार मलेसियामा रहेको नेपाली दूतावासले पनि श्रमिकको मागपत्र प्रमाणीकरणको काम सुरू गरिसकेको र माग प्रमाणीकरण भइ आएकोले श्रम स्वीकृति प्रदान गर्न थालिएको मन्त्रालयले जनाएको छ ।
यसैबीच, २८ जनवरीदेखि मागपत्र प्रमाणीकरणको काम सुरू गरेको मलेसियास्थित नेपाली दूतावासले नयाँ मागपत्र प्रमाणीकरणका लागि मंगलबार, बुधबार र बिहीबार पेस गर्न सकिने जानकारी दिएको छ । प्रमाणीकरण भएको मागपत्र सोमबार लिन सकिने दूतावासले जनाएको छ । तर, दूतावासमा मागपत्र प्रमाणीकरणका लागि आवश्यक कागजात पेस गर्नुभन्दा अघि दूतावासको वेबसाइटमा गएर त्यहाँ उपलब्ध अनलाइन फाराम भरेर समय लिनुपर्ने जनाइएको छ ।
-1745656903.jpeg)