काठमाडौं– त्रिभुवन अन्तर्राष्ट्रिय विमानस्थलमा राखिएको श्रम डेस्क हटाइएको छ । श्रम डेस्कमा सहीछाप लगाउने नाममा वैदेशिक रोजगारीमा जाने श्रमिकलाई दुःख दिइएको गुनासो बढेपछि श्रम, रोजगार तथा सामाजिक सुरक्षा मन्त्रालयले विमानस्थलमा राखेको श्रम डेस्क हटाएको हो ।
श्रम, रोजगार तथा सामाजिक सुरक्षामन्त्री कृष्णकुमार श्रेष्ठले विमानस्थलमा राखिएको श्रम डेस्क हटाउने निर्णय गरेका हुन् । मन्त्री श्रेष्ठको नेतृत्वसहितको मन्त्रालयको टोलीले बुधबार अन्तर्राष्ट्रिय विमानस्थलमा नै पुगेर श्रम डेस्क हटाएको थियो । अनलाइन सूचना प्रणाली (फेमिस) आइसकेको अवस्थामा विमानस्थलमा श्रम डेस्क आवश्यक नभएको मन्त्री श्रेष्ठले बताएका छन् ।
सहसचिव प्रमुख रहेको वैदेशिक रोजगार कार्यालयबाट श्रम स्वीकृति दिएपछि पनि श्रम डेस्कले श्रम स्वीकृति प्रक्रियामाथि छानबिन गर्ने नाममा श्रमिकलाई दुःख दिएको गुनासो आइरहेको र सोही कारणले यो डेस्क हटाइएको बताइएको छ । मन्त्री श्रेष्ठले विमानस्थलमा श्रमिकहरूको समस्यालाई समाधान गर्दै जाने बताएका छन् ।
विमानस्थलमा श्रमिकहरूका लागि यसअघि अर्को दर्जा जसरी छुट्टै गेटबाट प्रवेश दिने गरिएकोमा अब विमानस्थलका सबै गेटबाट प्रवेश गर्न पाउने व्यवस्था मिलाइएको मन्त्री श्रेष्ठले बताए । श्रमिकको प्रस्थानलाई छिटोछरितो बनाउन विमानस्थमा तीनवटै गेटबाट प्रवेश पाउने व्यवस्था गरिएको जनाइएको छ । मन्त्री श्रेष्ठले विमानस्थलमा राखिएको कोरोना भाइरसको पिसिआर परीक्षण जाँच गर्ने प्रक्रिया पनि हटाउन स्वास्थ्य तथा जनसंख्यामन्त्री विरोध खतिवडालाई आग्रह गरेका छन् । यसअघि वैदेशिक रोजगारीमा जाने र बिदामा आएका श्रमिक अनिवार्यरूपमा श्रम डेस्कमा गइ डेस्कले सहीछाप लगाइदिएपछि मात्रै बोर्डिङ गर्ने प्रक्रियामा अपनाउनुपर्ने अवस्था थियो । अब श्रमिकले श्रम डेस्कमा नगइ जुनसुकै गेटबाट पनि विमानस्थलमा प्रवेश पाउने बताइएको छ ।
विमानस्थलमा वैदेशिक रोजगार विभागले छुट्टै सूचना केन्द्र भने स्थापना गर्नेछ । केन्द्रले समस्यामा परेका श्रमिकको सहजीकरणका लागि काम गर्ने बताइएको छ । चालु आर्थिक वर्षको सात महिनामा मात्र तीन लाख ५० हजारभन्दा धेरै श्रमिकले त्रिभुवन विमानस्थल प्रयोग गरेका थिए । यसअघि वैदेशिक रोजगारीमा जान विमानस्थल पुगेका दैनिक दुई हजार श्रमिकले लामो लाइन बसेर श्रम स्वीकृतिको छाप लगाउनुपर्ने नियमका कारण सास्ती बेहोर्दै आएका थिए ।
