काठमाडौं– वैदेशिक रोजगारीमा जाने श्रमिकहरूलाई अभिमुखीकरण गराउने उद्देश्यका साथ चारवटा प्रदेशका वैदेशिक रोजगार व्यवसायीहरूका लागि पाँच दिने प्रशिक्षण कार्यक्रम सुरू भएको छ । वैदेशिक रोजगार बोर्डको सचिवालयले लुम्बिनी प्रदेशको बुटवलमा तालिम सुरू गरेको हो । तालिममा लुम्बिनी, गण्डकी, कर्णाली र सुदूरपश्चिम प्रदेशका व्यवसायी तथा प्रतिनिधिहरूको सहभागिता रहेको छ ।
व्यवसायीहरूको प्रशिक्षण कार्यक्रमको उद्घाटन कार्यक्रममा बोल्दै वैदेशिक रोजगार विभागका पूर्वमहानिर्देशक तथा स्थानीय विकास पशिक्षण प्रतिष्ठानका कार्यकारी निर्देशक कुमारप्रसाद दाहालले विभिन्न स्वार्थ समूहका कारण यो क्षेत्रमा समस्या आएको बताएका छन् । ‘वैदेशिक रोजगारीको क्षेत्रमा स्वार्थ समूहका कारण तमाम समस्याहरू रहेकाले सुधारका लागि प्रस्थानबिन्दु पूर्वप्रस्थान अभिमुखीकरण आवश्यक छ,’ उनले भने । उनले पैसाका कारण समस्या भएको बताउँदै अभिमुखीकरण तालिमका लागि म्यानपावरसँग कोटामा काम गर्ने गरेको बताए ।
दाहालले अहिले पनि नेपालबाट ७४ प्रतिशत अदक्ष नेपालीहरू वैदेशिक रोजगारमा जाने गरेको भन्दै यस्तो तथ्यांकलाई सुधार गर्नका लागिसमेत व्यवसायीहरू सजग हुनुपर्ने बताएका छन् । उनले व्यवसायीहरूले श्रमिकलाई औँठा छाप लागाउने काम मात्रै नगर्नसमेत आग्रह गरे ।
कार्यक्रममा बोल्दै वैदेशिक रोजगार बोर्डका कार्यकारी निर्देशक राजनप्रसाद श्रेष्ठले लुम्बिनी र गण्डकी प्रदेशबाट वैदेशिक रोजगारीमा जानेहरू अधिक रहेकाले विदेशमा मृत्यु हुनेको संख्या पनि यहीँ धेरै रहेको बताएका छन् । विदेशमा हुने मृत्युलाई समेत कम गर्नका लागि अभिमुखीकरण आवश्यक रहेको उनले बताए । रोजगारीका लागि विदेशमा गएर सकुशल फर्कनका लागि ज्ञान र सीपको आवश्यकता रहेको दाबी गरे । नेपालबाटै श्रमिकलाई शारीरिक र मानसिक रूपमा तयार बनाएर पठाउन सकेको खण्डमा विदेशमा हुने मृत्युदर कम हुने उनको विश्वास थियो ।
सोही कार्यक्रममा नेपाल वैदेशिक रोजगार अभिमुखीकरण व्यवसायी महासंघका अध्यक्ष रामराजा गौतमले श्रमिकहरू ठगिएपछि मात्रै प्रशिक्षण लिन आउने गरेको सुनाए । रोजगारीमा जानुभन्दा पहिले नै तालिम लिएर गएको खण्डमा यस्तो अवस्था नआउने उनले बताएका छन् । प्रशिक्षित भएर रोजगारीमा जाँदा उक्त देशको बारेमा कानुनी तथा अन्य विविध विषयमा जानकारी हुने र समस्या नआउने उनले दाबी थियो । प्रशिक्षण कार्यक्रममा चार प्रदेशका २५ जनाको सहभागिता रहेको वैदेशिक रोजगार बोर्डको सचिवालयले जनाएको छ ।
-1752335779.jpg)
