काठमाडौं– वैदेशिक रोजगारीमा जाने श्रमिकले अबदेखि ‘क्यूआर कोड’सहितको ई–स्टिकरमा छाप लागाउनु नपर्ने भएको छ । वैदेशिक रोजगार विभागले एक सूचना जारी गरी २५ फागुनदेखि ई–स्टिकर लगाउनु नपर्ने जनाएको हो ।
विभागका सूचना अधिकारी तथा निर्देशक कृष्णप्रसाद भुसालले जारी गरेको सूचनामा यसअघि त्रिभुवन अन्तर्राष्ट्रिय विमानस्थलमा रहेको वैदेशिक रोजगार विभागको श्रम डेस्कबाट ई–स्टिकरको प्रिन्ट प्रतिमा लगाइँदै आएको छाप बुधबारदेखि नलगाइने उल्लेख गरिएको छ । सूचनाअनुसार क्यू आर कोडसहितको ई–स्टिकर डाउनलोड गरेर वा प्रिन्ट गरेर साथमै राख्न भनिएको छ । तर, त्यस्तै प्रिन्ट गरेको प्रतिमा छाप लगाउनु नपर्ने बताइएको छ ।
क्यु आर कोडसहितको ई–स्टिकर श्रमिकको इमेलमा पठाइने तथा श्रमिकको फेम्स खातामा उपलब्ध हुने भएकाले डाउनलोड गरेर वा प्रिन्ट गरेर राख्न पनि सूचनामार्फत् आग्रह गरिएको छ । यस्तो स्टिकर श्रमिकले फाराम भर्दा उपलब्ध गराएको मोबाइल नम्बरमा एसएमएससमेत गरिने जनाइएको छ । यी विभिन्न माध्यमबाट उपलब्ध भएको सो स्टिकर डाउनलोड गरेर भने अनिवार्यरूपमा राख्नुपर्ने जनाएको छ ।
