काठमाडौं– गैरआवासीय नेपाली संघ (एनआरएनए) ले सञ्चालन गरेको ‘थ्री आर’ (‘सहायता, स्वदेश फिर्ता र पुनःस्थापना’) प्रोजेक्ट (परियोजना)मार्फत् करिब २८ हजार श्रमिक लाभान्वित भएका छन् । संघअन्तर्गतको वैदेशिक रोजगार तथा कल्याणकारी विभागले अन्तर्राष्ट्रिय दातृ निकायसँगको सहकार्यमा विदेशमा अलपत्र नेपालीका लागि सञ्चालन गरेको उक्त परियोजनाबाट २७ हजार ९५६ जना श्रमिक लाभान्वित भएका हुन् ।
संघले अन्तर्राष्ट्रिय श्रम संगठन आइएलओको १० करोड आर्थिक सहयोगमा उक्त परियोजना सञ्चालन गरेको थियो । सन् २०२० को अगस्टदेखि सुरू भएको परियोजना २०२२ को फेब्रुअरीसम्म चलेको संघले जानकारी दिएको छ । उक्त अवधिमा ती श्रमिकहरूले लाभ लिएका हुन् । यस परियोजना अवधिभर २८ हजार ५५७ नेपाली सूचीकृत भएको कार्यक्रमका संयोजकसमेत रहेका संघका उपाध्यक्ष डा.बद्री केसीले बताए । सूचीकृत भएकामध्ये २७ हजार ९५६ जनालाई सहयोग उपलब्ध गराइएको उनले बताए ।
यस परियोजनामार्फत् खाना तथा बासको व्यवस्था, घर फिर्तीका लागि आंशिक हवाई टिकट, कानुनी सहायता, पिसिआर परीक्षण, मानसिक स्वास्थ्य परामर्शमा सहयोग पुर्याइएको एनआरएनएले जनाएको छ । परियोजनामार्फत् १२ हजार ५१७ जनालाई मानसिक परामर्श सेवा उपलब्ध गराइएको बताइएको छ । यस्तै विभिन्न कारणले कागजातविहीन भएका पाँच हजार २५० श्रमिकलाई डकुमेन्टेसनमा सहयोग पुर्याइएको तथा तीन हजार ६९४ जनालाई खाना र बस्नको व्यवस्था गरिएको एनआरएनएले जानकारी दिएको छ ।
यस्तै, ५३१ जनालाई कानुनी सहायता उपलब्ध गराइएको संघद्वारा जारी विज्ञप्तिमा उल्लेख छ । समस्यामा परेका नेपाली श्रमिकमध्ये घर फिर्तीका लागि ७४९ जनालाई पिसिआर तथा ९८७ जनालाई आंशिक हवाई टिकटको व्यवस्था गरिएको संघले जनाएको छ । त्यस्तै यो अवधिमा संघले विभिन्न देशमा कैदी जीवन बिताइरहेका २३४ जना नेपालीलाई जेलमुक्त गराएर स्वदेश फिर्ता ल्याउन सफल भएको दाबी छ । दूतावासको समन्वयमा जरिवानाबापतको रकम तिरेर उनीहरूलाई जेलमुक्त गरिएको संघले जनाएको छ ।
त्यस्तै देशअनुसार यस परियोजनामार्फत् साउदी अरबबाट सात हजार ६५६, कतारमा छ हजार ९८५, मलेसियामा चार हजार १७०, युएईमा तीन हजार ४६५, कुवेतमा ९०, ओमनमा ३४, बहराइनमा ३३, कम्बोडियामा २२, र रसियामा दुई जनाले सहयोग पाएको जनाइएको छ । यसै परियोजना अन्तर्गत रसियाबाट नेपाली श्रमिक महिला र उनको दुधे बालिका तथा युएईबाट जुम्ल्याहा दुधे बालिका र उनकी आमालाई उद्धार गरिएको संघले जानकारी दिएको छ ।
-1752335779.jpg)
