काठमाडौं– बहराइनमा रहेको नेपाली दूतावासले त्यहाँ नेपाली उत्पादनको प्रदर्शनी गरेको छ । बहराइनको बालबालिका र आमा कल्याण समाजको संयोजकत्वमा अन्तर्राष्ट्रिय दूतावास बजारमा आयोजना गरिएको कार्यक्रममा नेपाली दूतवासले नेपाली उत्पादनको स्टल राखेर प्रदर्शनीमा भाग लिएको हो ।
उक्त प्रदर्शनीमा दूतावासले नेपाली उत्पादनहरू विभिन्न हस्तकला सामग्री, चिया, पस्मिनाका सललगायत राखेको दूतावासले जारी गरेको विज्ञप्तिमा उल्लेख छ । यसले नेपाली वस्तुको प्रवद्र्धनमा सहयोग पुग्ने दूतावासको भनाइ छ ।
बहराइनका राजकुमार शेख लुलवा बिन्त खलिफा एआई खलिफाले नेपाली स्टलको रूचिपूर्वक अवलोकन गरेको र विभिन्न नेपाली सामग्रीसमेत खरिद गरेको दूतावासले जनाएको छ । साथै, अन्य अवलोकनकर्ताले समेत नेपाली उत्पादनको प्रशंसा गर्दै हस्तकला, पस्मिनाका सल तथा चिया खरिद गरेको विज्ञप्तिमा उल्लेख छ ।
विगत लामो समयदेखि वार्षिक रूपमा सञ्चालन हुने प्रदर्शनीमा अन्य देशका दूतावासहरूले सहभागिता जनाउने गरेको भए पनि नेपाली दूतावासको सहभागिता यो नै पहिलोपटक हो । उक्त प्रदर्शनीमा नेपाली दूतावासका कार्यवाहक राजदूत अरूणा घिसिङलगायतको सहभागिता रहेको बताइएको छ । कार्यक्रममा आगन्तुकहरूमाझ नेपालको पर्यटन प्रवद्र्धनसम्बन्धी विभिन्न प्रचारात्मक सामग्रीसमेत वितरण गरिएको जनाइएको छ ।
